कोरोना संक्रमणको उपचार र भ्याक्सिनको शोध चोर्न चीनले ह्याकर लगाएको अमेरिकी आरोप
प्रकाशित मिति : जेष्ठ १, २०७७ बिहीबार
चीनसम्बद्ध ह्याकरहरुले अमेरिकाको कोभिड १९ सम्बन्धि शोधसँग सम्बन्धित तथ्यांकहरु र बौद्धिक सम्पत्ति चोर्न प्रयास गरेको भन्दै अमेरिकाले निन्दा गरेको छ । अमेरिकी विदेशमन्त्री माइक पम्पिओले वक्तब्य जारी गर्दै चीनलाई यस्तो हर्कत तुरुन्त बन्द गर्न चेतावनी दिएका छन् ।
अमेरिकी सरकारको एफबीआई र होमल्याण्ड सेक्युरिटीको साइबर सेक्युटिरी एजेन्सीले चीनसम्बद्ध ह्याकरले अमेरिकाको कोरोना भाइरसको भ्याक्सिनबारेको शोध चोर्न खोजेको पत्ता लगाएका हुन् । यस जानकारीको सम्भावित चोरीले सुरक्षित र प्रभावकारी उपचार विकल्पलाई जोखिममा पार्ने पम्पिओले बताएका छन् ।
साइबरस्पेसमा चीनको व्यवहार कोरोना महामारीभर प्रत्युत्पादक कार्यको विस्तार रहेको अमेरिकाले बताएको छ । चीनले पत्रकार, वैज्ञानिक र नागरिकलाई मौन राखेर गलत सुचनाहरु फैलाइरहेको र जसका कारण स्वास्थ्य संकटको खतरा बढेको पनि पम्पिओले आरोप लगाएका छन् ।
हिजोमात्र अमेरिकाको एफबीआईले चीनिया ह्याकरहरुले कोरोना संक्रमणको उपचार र भ्याक्सिनका शोधका डाटाहरु चोर्न खोजेको सार्वजनिक गरेका थिए । यसले कोरोनाको महामारीका सन्दर्भमा अमेरिका र चीनबीचको युद्धमा अझै इन्धन थपेको छ । ह्याकरको समुह चीनको सरकारसम्बद्ध रहेको एफबीआईले दावी गरेको छ ।