मे ६ देखि न्युयोर्क सिटी ट्रेन दैनिक ४ घण्टाको दरले बन्द हुने
प्रकाशित मिति : बैशाख १८, २०७७ बिहीबार
आगामी मे ६ देखि न्युयोर्क सिटीको ट्रेन ४ घण्टाको दरले बन्द हुने भएको छ । कोरोना भाइरससम्बन्धित सरसफाईका लागि र ट्रेनमा रहेका होमलेसहरुलाई हटाउनका लागि ट्रेन बन्द गरिने गभर्नर एन्ड्रयु कुमोले घोषणा गरेका छन् ।
न्युयोर्क सिटी ट्रेनको ११६ बर्षको इतिहासमा एकैपटक ट्रेनको सम्पूर्ण सेवा शटडाउन गर्न लागिएको यो पहिलो पटक हो । यसअगाडि प्राकृतिक विपत्ति वा अन्य कारणले कुनै कुनै ट्रेन वा रुटहरुमात्र बन्द गरिएपनि सम्पूर्ण सेवा भने बन्द गरिएको थिएन । पहिलोपटक न्युयोर्क ट्रेनको सेवा अब चौबीसै घण्टाबाट दैनिक २१ घण्टामा झर्ने भएको छ ।
ट्रेन बन्द गरिएको अवधिमा किटाणुनाषक औषधीले ट्रेनलाई सफा गरेर भाइरसमुक्त बनाउने प्रयास गरिनेछ । राती १ बजेदेखि ५ बजेसम्म ट्रेन बन्द गरिने र उक्त अवधिमा सबै यात्रुलाई ट्रेन छाड्नुपर्ने जनाइएको छ ।
यो अवधिमा पुलिस र होमलेस आउटरिच कामदारहरुले ट्रेनमा सुत्ने हजारौंलाई ट्रेनबाहिर निकाल्नेछन् र आवश्यक परेमा होमलेस सेल्टरमा लैजानेछन् । ट्रेन बन्द कहिलेसम्म हुने भन्नेबारे केही बताइएको छैन ।
न्युयोर्कमा एमटीएले मार्चको सुरुवातदेखि नै हरेक ७२ घण्टामा ट्रेन र बसहरु किटाणुनाषकले सफा गर्न सुरु गरेको थियो । तर गभर्नरले यो प्रयाप्त नभएको भन्दै ट्रेन सेवा नै अबरुद्ध गरेर सरसफाइको घोषणा गरेका हुन् । बसहरु पनि अब हरेक २४ घण्टामा सफा गरिने भएको छ ।
उक्त समयमा अत्यावश्यक कामदारलाईमात्र यात्रा गर्न सुझाव दिइएको छ । अत्यावश्यक कामदार पुष्टी गर्नेहरुले भाडाका गाडीहरुमार्फत निशुल्क कनेक्सनको सुविधा पाउनेछन् । अत्यावश्यकबाहेक अन्यले भने यो सुविधा पाउनेछैनन् ।
यो समयमा अरु बेला झण्डै १० हजार यात्रुहरुले ट्रेन प्रयोग गर्दै आएको र २ हजार होमलेसहरुले ट्रेनलाई सुत्नका लागि प्रयोग गर्दै आएको जनाइएको छ । अब उक्त समयमा ती होमलेसहरुलाई अस्पताल, सेल्टर वा सडकमा पठाइने भएको छ ।