महाकाली पौडेर नेपाल आएका युवा : प्रहरी नियन्त्रणमा
प्रकाशित मिति : चैत्र १७, २०७६ सोमबार
लकडाउनका कारण नेपाल-भारत सीमा बन्द भएपछि भारतीय सीमावर्ती शहरबाट नेपाल फर्कन लागेको मजदूरहरू भारतको धार्चुलामा अलपत्र परेका छन् ।
करिब ४५० भन्दा बढीको संख्या रहेका उनीहरुले आफ्नो जिल्ला फिर्न पाउनुपर्ने माग गर्दै नाराबाजी गरेका छन् । भारतको पिथौरागढ, चम्पावत, धार्चुलालगायतका शहरमा मजदुरी गरेर घर फर्कन लागेका दार्चुला, बैतडीलगायत जिल्लाका मजदूर दार्चुला सदरमुकास्थित महाकालीपारि धार्चुलामा अलपत्र परेका हुन् । उनीहरु २ दिनदेखि त्यहाँ रोकिएका छन् तर स्थानीय प्रशासनले समन्वय गरेर स्वदेश झिकाउने तत्परता देखाएको छैन ।
‘आफ्नो जनता फिर्ता ले, नेपाल नाका खुला गर’ भन्दै उनीहरूले नाराबाजी गरिरहेको भिडियो नबबहादर विष्टले ट्वीटरमा हालेका छन् । जहाँ सयौँ नेपाली उत्तेजित भएर नाराबाजी गरिरहेको देखिन्छ ।
यसैबीच २ दिनदेखि नाकामा अलपत्र पर्दा पनि प्रशासनले अनुमति नदिएपछि एक युवा महाकाली पौडेरै नेपाल आएका छन् । नरबहादुर विस्टले नै दोस्रो ट्वीट गर्दै भनेका छन्, ‘…नेपाल आउने अनुमती नपाएपछि जोखिमपुर्ण किसिमले महाकाली नदीमा पौडी खेलेर नेपाल आएका इन्द्रराज खत्री । उनी अहिले प्रहरी नियन्त्रणमा छन् ।’