न्युयोर्कको सेन्ट्रल पार्क नर्थ स्टेशनमा आगलागी, ट्रेन चालकको निधन, ९ जना अस्पताल भर्ना
प्रकाशित मिति : चैत्र १४, २०७६ शुक्रबार
शुक्रबार विहान न्युयोर्कको सेन्ट्रल पार्क नर्थ स्टेशनमा भएको आगलागीका क्रममा यात्रुहरुलाई त्यहाँबाट निकालेर जोगाउन खोज्दा ट्रेन चालकको निधन भएको छ । बु्रकलिनका ट्रेन चालक ग्यारेट गोब्लेको निधन भएको हो ।
विहान सबा तीनबजे सेन्ट्रल पार्क नर्थ स्टेशन ११० स्ट्रीटमा उद्दारकर्ताहरु पुग्दा धुँवासहितको आगोका कारण चालक बेहोस अवस्थामा भेटिएका थिए । उनलाई तत्काल माउन्ट साइनाई अस्पतालमा लगिएको थियो । तर अस्पतालमा उनलाई बचाउन सकिएन ।
गम्भिर घाइते भएका तीनजना पुरुष र एकजना महिलालाई पनि अस्पतालमा भर्ना गरिएको छ । त्यस्तै अन्य ५ जना अग्नीनियन्त्रकहरुलाई पनि अस्पतालमा भर्ना गरिएको छ । कम्तीमा ७ जनालाई घटनास्थलमा नै उपचार गरिएको थियो ।
ब्रोंक्स जाँदै गरेको २ नम्बर ट्रेनको दोश्रो डब्बामा आगो सुरु भएको थियो । आगलागी कसरी भयो भन्ने बारेमा अनुसन्धान भइरहेको छ । सोही समयमा प्लेटफर्मका अन्य स्थानमा पनि आगो लागेको जनाइएको छ ।
अनुसन्धानकर्ताहरुले ट्रेनभित्र जलेको सपिंग कार्ट फेला पारेका थिए । तर त्यहीबाट आगो सुरु भएको हो वा होइन भन्नेबारे स्पष्ट छैन । अहिलेसम्म कसैलाई पनि पक्राउ गरिएको छैन ।
आगलागीपछि धुंवा भरिंदा यात्रुहरु निसासिएका थिए । यो ट्रेनका पछाडि अर्को ट्रेन पनि रहेको र त्यसमा रहेका यात्रुहरुलाई सकुशल निकालिएको जनाइएको छ ।