बढी भीडभाड र जोखिम हुने १६ स्थानमा प्रहरीले ग-यो यस्तो काम !
प्रकाशित मिति : चैत्र ९, २०७६ आईतबार
महानगरीय प्रहरी आयुक्तको कार्यालय रानीपोखरीले कोराना संक्रमणको जोखिम न्यूनीकरणका लागि उपत्यकाका १६ स्थानमा हात धुने व्यवस्था गरेको छ ।
विश्वमा महामारीको रूप लिएको नोबेल कोरोना भाइरस (कोभिड–१९) रोकथामका लागि महानगरीय प्रहरीले बढी भीडभाड र जोखिम बढी हुने स्थानहरूमा सर्वसाधारणलाई हात धुन साबुनसहित पानी ट्यांकी राखेको हो ।
माछापुच्छे बैंकसँगको सहकार्यमा महानगरीय प्रहरी कार्यालयले काठमाडौं, ललितपुर र भक्तपुरको बढी भीडभाड हुने स्थानहरूमा पानी ट्यांकी राखिएको महानगरीय प्रहरी आयुक्त डिआईजी विश्वराज पोखरेलले बताए ।
नियमित साबुनपानीले हात धुने तथा सेनिटाइजरको प्रयोग र मास्क लगाउने गरेमा पनि कोरोनाको जोखिम न्यूनीकरण गर्न सकिने विशेषज्ञको रायअनुसार साबुनपानीले हात धुने व्यवस्था गरिएको डिआईजी पोखरेलले बताए ।
डिआईजी पोखरेलले बढी भीडभाड हुने स्थानहरू रत्नपार्क, बानेश्वर, गौशाला, केएमसी अस्पताल सिनामंगल, महाराजगञ्ज चोक, शिक्षण अस्पताललगायतका स्थानमा साबुनपानीले हात धुने व्यवस्था गरिसकेको बताए ।
त्यस्तै प्रसूति गृह थापाथली, टेकु अस्पताल, पाटन अस्पतालसँगै ललितपुर र भक्तपुरका बढी भीडभाड हुने स्थानहरूमा सोमबारदेखि हात धुने व्यवस्था गरिने पोखरेलले बताए । योसँगै सार्वजनिक स्थानमा सुरक्षार्थ खटिने प्रहरीका लागि कार्यालयले मास्कसमेत वितरण गरेको छ ।