न्युयोर्कका घरधनीलाई ९० दिन मोर्गेज राहत
प्रकाशित मिति : चैत्र ६, २०७६ बिहीबार
न्युयोर्कका गभर्नर एन्ड्रयु कुमोले न्युयोर्क राज्यभर ९० दिनका लागि मोर्गेज राहत घोषणा गरेका छन् । कोरोना भाइरसको संक्रमणका बेलामा न्युयोर्क राज्यका बासिन्दालाई आर्थिक कठिनायीबाट राहत दिलाउन यस्तो घोषणा गरिएको हो ।
न्युयोर्क राज्यभरका घरमालिकहरुले आगामी ९० दिनसम्म मोर्गेज नतिरेपनि कुनै अप्ठ्यारो हुनेछैन । आर्थिक समस्याका कारण मोर्गेज तिर्न नपर्ने सुविधादेखि मोर्गेज नतिर्दा क्रेडिट ब्यूरोलाई कुनै नकारात्मक रिपोर्ट नगर्नेसम्मको प्याकेज कुमोले घोषणा गरेका छन् ।
यो अवधिमा कुनै बिलम्ब शुल्क पनि लिइनेछैन । अनलाइन तिर्दा लिइने शुल्क पनि नलिइने भएको छ ।
लिलामीमा परेका घरहरु पनि तत्काल लिलामी नगरिने भएको छ । या त त्यस्तो लिलामी खारेज गरिने भएको छ या त पछि सारिने भएको छ ।
यसैबीच न्युयोर्कका गभर्नर एन्ड्रयु कुमोले न्युयोर्क सिटीका लागि तत्काल क्वारेन्टाइनको कुनै योजना नरहेको बताएका छन् । न्युयोर्क सिटीका मेयर बिल ब्लाजिओले न्युयोर्क सिटी लकडाउन हुनसक्ने बताइरहदा गभर्नर कुमोले भने तत्काल त्यस्तो सम्भावना नभएको बताएका छन् ।