१४ जनामा कोरोना संक्रमणपछि अमेरिकाको ओरेगनमा पनि संकटकाल
प्रकाशित मिति : फाल्गुन २५, २०७६ आईतबार
अमेरिकाको ओरेगन राज्यमा १४ जनामा कोरोना भाइरस संक्रमणपछि संकटकाल घोषणा गरिएको छ । कोरोना भाइरसका थप ७ नयाँ केसहरु पुष्टी भएपछि गभर्नर केट ब्राउनले संकटकालको घोषणा गरेका हुन् । संकटकालको घोषणापछि अब राज्यलाई आपतकालिन कोष परिचालनमा बाटो खुलेको छ ।
अमेरिकाका अहिलेसम्म कोरोना संक्रमितको संख्या ४७० पुगेको छ । अहिलेसम्म अमेरिकामा ३२ वटा राज्यमा संक्रमण फैलिएको छ भने १९ जनाको मृत्यु भइसकेको छ । कोरोनाबाट सबैभन्दा धेरै न्युयोर्क, वासिंटन राज्य र क्यालिफोर्नियामा संक्रमित भएका छन् ।
अहिलेसम्म वासिंटन राज्यमा १०५ जना संक्रमित भएका छन् । न्युयोर्कमा पनि संक्रमितको संख्या १०५ नै रहेको छ । क्यालिफोर्नियामा संक्रमित ८२ मध्ये एकजनाको ज्यान गएको छ ।
न्युयोर्क राज्यमा १०५ मध्ये न्युयोर्कको वेस्टचेस्टर काउन्टीमा ८२ जनामा संक्रमण भएको छ भने न्युयोर्क सिटीमामात्र १२ जनामा संक्रमण भएको छ । त्यस्तै रकल्याण्ड काउन्टीमा २, नासु काउन्टीमा ५ , सारागोटा काउन्टीमा २ जना, सफल्कमा १ र उल्स्टेरमा १ जनामा संक्रमण भएको छ ।
गभर्नर कुमोले न्युयोर्कमा कोरोनाको परीक्षण आक्रमक रुपमा गरिरहेको जानकारीदिएका छन् । उनले सावधानी अपनाउन तर नडराउन भनेका छन् ।
उनले न्युयोर्कबासीहरुलाई कोरोना संक्रमणबाट बच्न ४ वटा सुझावहरु दिएका छन् । २० सेकेण्डभन्दा बढी हात धुन, हात नमिलाउन, बिरामी भएमा घरमै बस्न, खोक्दा वा हाछ्यु गर्दा टिस्यु वा कुहिनोमा गर्न गभर्नर कुमोले सुझाव दिएका छन् ।
न्युयोर्कमा कोरोना संक्रमितको संख्या बढ्दै गएपछि हिजो राज्य संकटकालको घोषणा गरिएको थियो । न्युयोर्कका गभर्नर एन्ड्रयु कुमोले राज्य संकटकालको घोषणा गरेका थिए ।
संकटकालको घोषणा गरेपछि कोरोनाबिरुद्ध लड्न अझ धेरै जनशक्ति काममा लगाउन सकिने भएकाले संकटकाल घोषणा गरेको कुमोले जनाएका छन् । तनावमा रहेका स्थानीय स्वास्थ्य विभागलाई सहयोगका लागि संकटलिन अवस्थाको घोषणा गरेपछि राज्यलाई थप शक्ति मिलेको छ ।