न्युयोर्कमा क्वीन्समा बस्ने ट्याक्सी ड्राइभरलाई कोरोना संक्रमण, हिडेरै पुगे अस्पताल
प्रकाशित मिति : फाल्गुन २४, २०७६ शनिबार
न्युयोर्कको क्वीन्समा बस्ने एकजना ट्याक्सी ड्राइभरलाई कोरोना संक्रमण भएको पुष्टी भएको छ । उनी हिडेरै चेकअपका लागि अस्पताल गएका थिए ।
मंगलबार सेन्ट जोन्स अस्पतालमा वाक इन उपचार गराउन गएका उनमा कोरोना संक्रमण पुष्टी भएको छ । उनले एप्लीकेशनमार्फत ट्याक्सी चलाउँदै आएको जनाइएको छ । तर कुन एप्लीकेशन भन्ने खुलाइएको छैन ।
ती ड्राइभर खुल्लमखुल्ला हिडेर अस्पताल पुगेपछि उक्त अस्पतालका ४० जना डाक्टर र नर्सहरुलाई सेल्फ क्यारेन्टाइनमा पठाइएको छ । उक्त व्यक्तिलाई अहिले अस्पतालमा नै आइसोलेसनमा राखिएको छ ।
उनको गाडीमा चढेका अरुलाई पनि कोराना संक्रमण हुनसक्ने आंशका गरिएको छ । त्यसबारे अनुसन्धान भइरहेको छ ।
यसैबीच न्युयोर्कमा राज्य संकटकालको घोषणा गरिएको छ । न्युयोर्कका गभर्नर एन्ड्रयु कुमोले राज्य संकटकालको घोषणा गरेका हुन् ।
संकटकालको घोषणा गरेपछि कोरोनाबिरुद्ध लड्न अझ धेरै जनशक्ति काममा लगाउन सकिने भएकाले संकटकाल घोषणा गरेको कुमोले जनाएका छन् । तनावमा रहेका स्थानीय स्वास्थ्य विभागलाई सहयोगका लागि संकटलिन अवस्थाको घोषणा गरेपछि राज्यलाई थप शक्ति मिलेको छ ।
अमेरिकामा कम्तीमा १५ जनाको सफल उपचार भइसकेको छ । जसमा ६ जना क्यालिफोर्नियाका, नेब्रास्कामा ४, इलिनोयमा २, वासिंटनमा १ जना, एरिजोनामा एकजना र विसकन्सिनमा एकजना रहेका छन् ।