डेलीमेल : साढे ९ करोडमा कोरोना संक्रमण र ५ लाखको मृत्युका लागि अमेरिकी अस्पतालको तयारी
प्रकाशित मिति : फाल्गुन २४, २०७६ शनिबार
बेलायतबाट प्रकाशित हुने डेलीमेलले अमेरिकी अस्पतालहरुले अमेरिकामा ९६ मिलियन व्यक्ति कोरोना संक्रमित हुनसक्ने र ४ लाख ६० हजारको मृत्यु हुनसक्ने अनुमान सहित तयारी गरेको दावी गरेको छ । डेलीमेलले यसबारेमा आफूहरुले गोप्य डकुमेन्ट फेला पारेको दावी गरेको छ ।
डेलीमेलमा प्रकाशित समाचार यस्तो छ ।
अमेरिकन अस्पताल एसोसिएसनले आयोजना गरेको एउटा प्रिजेन्टेसनमा कोरोना संक्रमणबाट अमेरिकामा ४ लाख ८० हजारको ज्यान जानसक्ने अनुमान पेश गरिएको थियो । युनिभर्सिटी अफ नेब्रास्का मेडिकल सेन्टरका प्रोफेसर डाक्टर जेमस ललेरले अस्पतालहरु र स्वास्थ्यकर्मीहरु समक्ष उक्त अनुमान पेश गरेका थिए । कोरोनाको संक्रमणबिरुद्ध तयारी गर्न स्वास्थ्यकर्मीहरुले जान्नुपर्ने कुराहरु विषयक कार्यक्रममा यो अनुमान पेश गरिएको हो ।
उक्त डकुमेन्टमा पहिले नै स्वास्थ्य अवस्था नराम्रो भएकाहरु र ८० कटेकाहरु कोरोनाको संक्रमणबाट ज्यान गुमाउने उच्च जोखिममा रहेको बताइएको छ । नेब्रास्का मेडिसिनका प्रवक्ताले भने डाक्टर ललेरले पेश गरेको अनुमानले ती डाक्टरको धारणामात्र प्रतिनिधित्व गर्ने बताएका छन् ।
यसअगाडि हार्भड विश्वविद्यालयका प्रोफेसर मार्क लिपसिचले अर्कोबर्षभित्र कोरोना भाइरसबाट विश्वको ७० प्रतिशत जनसंख्या संक्रमित हुने बताएका थिए ।
अमेरिकामा फ्लुबाट हरेकबर्ष ठूलो संख्यामा मानिसको ज्यान जाने गरेको छ । यसबर्षको फ्लु सिजनमामात्र अमेरिकामा १६ हजार भन्दा धेरैको ज्यान गएको छ भने २ लाख ८० हजार अस्पतालमा नै भर्ना भएका छन् । तर यो सिजनमा मात्र अमेरिकामा फ्लुबाट संक्रमित हुनेहरु भने झण्डै ३ करोड रहेका छन् ।
गत बर्षको फ्लु सिजनमा अमेरिकामा ४ लाख ९० हजार ६ सय व्यक्ति अस्पतालमा भर्ना भएका थिए भने ३४ हजार २ सयको मृत्यु भएको थियो । अमेरिकामा बर्षेनी फैलिने फ्लुयन्जाको तुलनामा कोरोना संक्रमण अझ बढी हुने अनुमान गरिएको हो ।
अहिलेसम्म अमेरिकामा कोरोना संक्रमितको संख्या ३ सय ९५ रहेको छ । कोरोनाबाट अमेरिकामा मृत्यु हुनेको संख्या १९ पुगेको छ ।