नेपालमा कोरोना भाइरस इरानमा जस्तो भयो भने के गर्ने : सांसद गगन थापा
प्रकाशित मिति : फाल्गुन २३, २०७६ शुक्रबार
प्रमुख प्रतिपक्षी दल नेपाली कांग्रेसका सांसद गगन कुमार थापाले कोरोना भाइरस इरानमा जस्तै गरी नेपालमा पनि फैलिए के गर्ने भन्दै संसदमा प्रश्न उठाउनुभएको छ ।
प्रतिनिधि सभाको आज बसेको बैठकमा विभिन्न देशमा कोरोनाका कारण ज्यान गुमाउनेको संख्या बढिरहेको अवस्थामा नेपाल संक्रमणदेखि बाहिर रहनु सुखद् भए पनि इरानकाे जस्ताे अवस्था बेहोर्नु परे के होला भन्दै प्रश्न उठाउनुभएको छ । अन्य देशमा सांसद, मन्त्रीहरुसम्मलाई संक्रमण भएको स्मरण गराउँदै उहाँले भन्नुभयाे, ‘अहिले हामी कामना गरेर बस्ने कि यो समयको सदुपयोग गर्ने ?’
विश्व स्वास्थ्य संगठनले समेत जोखिमको देशहरुको सुचीमा नेपाललाइ पनि राखिएको कुरा स्मरण गराउँदै उहाँले भन्नुभयो, ‘नेपाललाई देशको भुअवस्थितिको कारण मात्र जोखिममा राखिएको होइन । हाम्रो आफ्नो क्षमताको कारण सीमामा चेकजाँच गर्ने हाम्रो क्षमता, सिंगो स्वास्थ्य प्रणालीको क्षमता, यी सबै कुराका कारण पनि नेपाल उच्च जोखिममा रहेको हाे ।’
उहाँले कोरोनाभाइरसलाई नेपाल आउनै नदिन र फैलन नदिनको लागि तयारी अवस्थामा रहनुपर्ने बताउनुभयो । यो एउटा स्वास्थ्य मन्त्रालयको कुरा मात्र नभएको भन्दै उहाँले सरकारको मात्र नभई सबैले यस अवस्थामा जिम्मेवारपूर्ण ढंगले सोच्नुपर्ने बताउनुभयो ।
फेब्रुअरी २० देखी २७ सम्ममा मात्र इटाली, जापान, कोरिया र चीनसम्मको गरी १३७८ जना नागरिक नेपाल प्रवेश गरेको र तिनीहरु कहाँ छन् भन्ने ट्याकिङ नभएको उहाँकाे भनाइ थियाे ।
बाहिरबाट नेपाल आउने काे नेपाली नागरिक वा गैरनेपाली नागरिक हुन्, कुन देशलाई पूर्ण रुपमा रोक्ने, कुन देशबाट प्रवेश गर्नेलाई क्वारेन्टाइनमा राख्ने, कुन देशबाट आउने मान्छेलाई निरन्तर ट्याकिङ गर्ने भन्ने कुरामा स्पष्ट हुनुपर्ने समेत उहाँले बताउनुभयो ।