अमेरिकाको क्यालिफोर्नियामा सङ्कटकाल घोषणा
प्रकाशित मिति : फाल्गुन २२, २०७६ बिहीबार
कोरोना भाइरस संक्रमित व्यक्तिको मृत्यु भएपछि सम्भावित खतरालाई मध्यनजर गर्दै अमेरिकाको क्यालिफोर्नियामा आपतकाल घोषणा गरिएको छ। कोरोना संक्रमणका कारण अमेरिकामा हालसम्म ११ जनाको मृत्यु भइसकेको छ । त्यस्तै अमेरिकाका १६ राज्यमा अहिलेसम्म १५० बढी संक्रमित रहेको बिबिसीमा जनाइएको छ ।
अधिकारीहरुका अनुसार विश्वमा अहिले ९२ हजार बढी कोरोनाभाइरसका बिरामी भेटिएका छन् । जसमध्ये ८० हजार चीनमा मात्रै छन् । तीनहजार १ सयबढीको मृत्यु भइसकेको छ ।कोरोना फैलिएका विश्वका अन्य मुलुकले पनि सतर्कता अपनाउन थालेका छन्।
कोरोना संक्रमणका कारण १०७ जनाको ज्यान गइसकेको इटालीमा आज (शुक्रबार) देखि आगामी १० दिनसम्म देशभरका विद्यालय बन्द गरिएको छ भने ‘इटालियन सिरी ए’ फुटबलसहित सबै व्यवसायिक खेलहरुलाई एक महिनाका लागि स्थगित गरिएको छ। त्यस्तै फ्रान्स,चीन, हङ्गकङ्ग, जापान, इराक लगायतका देशले कोरोना संक्रमण फैलन नदिन पठनपाठन बन्द गरिसकेका छन्।