अमेरिकामा कोरोना संक्रमितको संख्या एकसय, क्यानडामा २७
प्रकाशित मिति : फाल्गुन १९, २०७६ सोमबार
अमेरिकाको वासिंटन राज्यमा कोरोना भाइरस संक्रमणबाट ६ जनाको मृत्यु भएको छ । किङ काउन्टीमा ५ जना र स्नोहोमिस काउन्टीमा एकजनाको मृत्यु भएको पुष्टी भएको छ । अहिलेसम्म अमेरिकामा १०० जनामा कोरोना संक्रमण पुष्टी भएको छ ।
अमेरिकामा उपचार भइरहेका ७ जनाको अवस्था गम्भिर रहेको जनाइएको छ । ९ जनाको भने सफल उपचार गरिएको छ ।
न्युयोर्कमा पनि कोरोना भाइरस संक्रमणको पुष्टी भएको छ । ३५ बर्ष काटेकी एक महिलामा कोरोना संक्रमण पुष्टी भएको हो । उनमा ईरान भ्रमणको क्रममा संक्रमण भएको जनाईएको छ । हाल उनलाई घरमै आइसोलेसनमा राखिएको छ ।
त्यस्तै क्यानडामा कम्तीमा २७ जनामा संक्रमण पुष्टी भएको छ । क्यानडामा ओन्टारियोमा १८, ब्रिटिस कोलम्बियामा ८ र क्युबेकमा १ जनामा संक्रमण पुष्टी भएको छ ।
अहिलेसम्म विश्वभर ९० हजार ३ सय ६ मा कोरोना संक्रमण पुष्टी भएको छ भने मृतकको संख्या ३०८७ पुगेको छ । संक्रमित ४५ हजार ७ सय ५ को सफल उपचार गरिएको छ ।
दक्षिण कोरियामा ज्यान गुमाउनेको संख्या २८ पुगेको छ भने संक्रमितको संख्या ४३३५ पुगेको छ । इटलीमा ५५ जनाको ज्यान गएको छ भने इरानमा ६६ जनाको ज्यान गएको छ । इटलीमा २०३६ जनामा संक्रमण पुष्टी भएको छ भने इरानमा संक्रमितको संख्या १५०१ पुगेको छ ।
जापानमा अहिलेसम्म ६ जनाको मृत्यु भएको छ भने २७४ मा संक्रमण भएको छ । जापानको क्रुजसिपबाट उद्दार गरिएका ७ जनाको मृत्यु भइसकेको छ भने ३६ जनाको अवस्था गम्भिर रहेको छ । त्यहाँ ७०५ मा संक्रमण पुष्टी भएको थियो ।