प्रथम महिला मेलानिया ट्रम्पले अग्नीनियन्त्रकलाई चुम्बन गरेको तस्वीर पुन: सार्वजनिक
प्रकाशित मिति : फाल्गुन १६, २०७६ शुक्रबार
अमेरिकी राष्ट्रपति डोनाल्ड ट्रम्पकी पत्नी मेलानिया ट्रम्पले अग्नीनियन्त्रकलाई चुम्बन गरेको तस्वीर न्युयोर्क म्यागाजिनले प्रकाशित गरेको छ । उक्त तस्वीर सन् २००२ मा खिचिएको र त्यतीबेला मेलानिया ट्रम्पको नाम मेलानिया नस रहेको थियो, जसलाई न्युयोर्क म्यागाजिनले भ्यालेन्टाइन्स डेको कभरका लागि फोटोसेसन गराएको थियो ।
सेप्टेम्बर ११ को हमलाको केही महिनापछि उक्त तस्वीर खिचिएको थियो । सेप्टेम्बर ११ को हमलापछि अग्नीनियन्त्रकहरुप्रति सबैको ध्यान केन्द्रीत रहेको थियो । अग्नीनियन्त्रकप्रति माया व्यक्त गर्ने उद्देश्यले न्युयोर्क म्यागाजिनले यस्तो फोटोसेसन गराएको थियो ।
फोटोमा महिलाका लागि मोडल मेलानिया ट्रम्पको प्रयोग गरिएपनि पुरुष भने वास्तविक अग्नीनियन्त्रक नै थिए , जसको नाम डानियल केन थियो । उनले पार्टटाइम मोडलका रुपमा समेत काम गर्थे । तर मेलानियालाई भने न्युयोर्क म्यागाजिनले एजेन्सीबाटै भाडामा ल्याएको थियो ।
न्युयोर्क म्यागाजिनले ती मोडललाई बिर्सिसकेको थियो । किनभने उनी त्यतीबेला डोनाल्ड ट्रम्पसँग विवाह गरेकी थिइनन् भने खासै चर्चामा पनि थिइनन् । त्यतीेबेला आफूहरु भविश्यकी अमेरिकाकी प्रथम महिलासँग काम गरेको कुरा नसोंचेको पत्रकार म्याट हावरले आफ्नो पोष्टमा उल्लेख गरेका छन् ।
गत हप्ता पत्रकार हावरले उक्त तस्वीरमा रहेका मोडल तथा अग्नीनियन्त्रक केनलाई सम्पर्क गरेका थिए जो न्युयोर्क फायर डिपार्टमेन्टका बटालियन प्रमुख रहेका छन् । केनले फोटोसेसन गर्ने बेला मेकअप म्यानले ती मोडल डोनाल्ड ट्रम्पकी प्रेमीका रहेको कुरा बताएपनि आफूले खासै ध्यान नदिएको केनले स्मरण गरेका छन् ।