न्युयोर्कमा मार्च १ देखि प्लास्टिक झोलामा प्रतिबन्ध, कागजको झोलालाई शुल्क
प्रकाशित मिति : माघ २९, २०७६ बुधबार
न्युयोर्कमा राज्यब्यापी रुपमा आगामी मार्च १ देखि ग्रोसरी स्टोरहरु, रेष्टुरेण्ट र अन्य व्यापार व्यवशायमा प्लास्टिकको झोला प्रयोगमा प्रतिबन्ध लगाइएको छ । अर्थात् मार्च १ पछि किनमेल गर्न जानेहरुले सामान राख्नका लागि आफ्नो झोला लिएर जानुपर्नेछ ।
कतिपय स्टोरहरुले प्लास्टिकको झोलाको साटो कागजको झोला अफर गर्न त सक्नेछन् तर त्यसका लागि शुल्क तिर्नुपर्नेछ । न्युयोर्कमा हरेक बर्ष १० बिलियन प्लास्टिक झोलाहरु प्रयोग हुँदै आएको तथ्यांक छ । प्लास्टिकको प्रयोग कम गर्न यो नियम ल्याइएको हो ।
कतिपय स्टोरले कागजको झोला समेत नदिने भएकाले ग्राहकले आफैले झोला लिएर जानुपर्ने सुझाव दिइएको छ । तर मासुहरु पोको पार्न, फोहोर राख्न वा अन्य त्यस्तै प्रयोजनका लागि भने प्लास्टिकको प्रयोग हुनसक्नेछ ।
मार्चदेखि यो नियम लागु हुने भएतापनि न्युयोर्क सिटीको सेनिटेशन डिपार्टमेन्टले पुन प्रयोग गर्न मिल्ने झोलाहरु वितरण गर्न सुरु गरेको छ । यस्ता झोलाहरु निशुल्क प्राप्त गर्न सकिनेछ ।
प्लास्टिकमा प्रतिबन्ध लगाउनु अगाडि न्युयोर्क सिटीका ५ वटै बोरोहरुमा पुन प्रयोग गर्ने झोला वितरणका लागि कार्यक्रमहरु सुरु गरिएको छ । क्वीन्समा आज युनियन टर्नपाइकमा यस्ता झोला बाडिएको थियो भने फरबरी २९ मा ११५ – २१ फार्मर्स ब्लुभर्डमा बाडिने भएको छ ।
म्यानहटनमा फरबरी १५ मा ८ इस्ट १०९ स्ट्रीटमा बाडिने छ भने बु्रकलिनमा फरबरी १३ मा १५५५ लिण्डेन ब्लुभर्डमा र फरबरी २७ मा ६६५ न्यु लट्स एभिन्युमा बाडिने भएको छ ।