एकैदिनमा ट्रम्पका ६० ट्वीट
प्रकाशित मिति : माघ १०, २०७६ शुक्रबार
अमेरिकी राष्ट्रपति डोनाल्ड ट्रम्प आज दिनभरमा कम्तीमा ६० पटक ट्वीट र रिट्वीट गरेका छन् । अधिकांश ट्वीट र रिट्वीटहरु महाअभियोगको सन्दर्भमा रहेका छन् भने डेमोक्र्याट्सहरुको आलोचनामा रहेका छन् ।
The Do Nothing Democrats just keep repeating and repeating, over and over again, the same old “stuff” on the Impeachment Hoax. They want to use up ALL of their time, even though it is the wrong thing to do. They ought to go back to work for our great American people!
— Donald J. Trump (@realDonaldTrump) January 24, 2020
राष्ट्रपति ट्रम्पबिरुद्धको महाअभियोगको कारवाही सिनेटमा अगाडि बढिरहेको छ । सुरुवाती तर्क पेश गर्ने आज अन्तिम दिनमा डेमोक्रेटिक मेनेजरहरुले अभियोजनहरु पेश गरिरहेका छन् । सिनेटमा अभियोजनकर्ताका रुपमा प्रतिनिधिसभाका केही डेमोक्रेटिक सांसदहरुलाई मेनेजरका रुपमा नियुक्त गरिएको छ ।
सबै सिनेटरहरुले जुरीका रुपमा काम गर्ने गरी सपथग्रहण गरेका छन् । ट्रम्पका वकिलहरुले भने प्रतिरक्षा स्वरुप आफ्नो तर्क पेश गर्नेछन् । भोलि सिनेटको कारवाही विहान १० बजे सुरु हुनेछ भने ट्रम्पका वकिलहरुले प्रतिरक्षामा तर्कहरु पेश गर्नेछन् ।
ट्रम्पमाथि शक्तिको दुरुपयोग र संसदको महाभियोग अनुसन्धानमा बाधा पुर्याएको आरोप लगाइएको छ। उनले आफूले कुनै गलत कार्य नगरेको र डेमोक्र्याटहरुले राजनीतिक कारणले आफूलाई निकाल्न खोजेको आरोप लगाएका छन्।
ट्रम्पबिरुद्धको महाअभियोग प्रस्ताव गत महिना प्रतिनिधिसभाले पारित गरेको थियो । डेमोक्रेटिक बहुमत रहेको प्रतिनिधिसभाले ट्रम्पबिरुद्धको प्रस्ताव पारित गरेपनि रिपब्लिकन बहुमत रहेको सिनेटले ट्रम्पलाई दोषी ठहर गरेर पदबाट निकाल्ने अपेक्षा भने गरिएको छैन ।
सुनुवाई चलिरहँदा सिनेटरहरुलाई ट्वीट गर्न र साइड टक गर्न प्रतिबन्ध लगाइएको छ । साथै असम्बन्धित बाहिरी कागजात पढ्न समेत रोक लगाइएको छ ।