न्युयोर्कमा पनि टोकियो, पेरिस र बर्लिनकै जस्तो ट्रेन चलाइने
प्रकाशित मिति : माघ ७, २०७६ मंगलबार
अब न्युयोर्कमा पनि टोकियो, पेरिस, बर्लिन र हङकङकै जस्तो ट्रेन चलाइने भएको छ । एमटीएले मंगलबार न्युयोर्कमा ल्याइन लागेको नयाँ ट्रेनको डिजाइनका केही तस्वीरहरु सार्वजनिक गरेको हो ।
नयाँ प्रकारको ट्रेनमा एउटा डिब्बाबाट अर्कोमा सहजै जानसकिनेछ । अर्थात् ट्रेनका डिब्बाहरुलाई एकप्रकारको बाटोले जोड्नेछ । अहिलेजस्तो एउटा डिब्बाबाट अर्कोमा जानु गैरकानुनी हुनेछैन ।
नयाँ डिजाइनको ट्रेनमा यात्रुहरु सहजै यताउता गर्न सक्नेछन् भने अहिलेको तुलनामा धेरै यात्रुहरु चढ्नसक्ने जनाइएको छ । यो ट्रेन अहिले निर्माणाधिन अवस्थामा रहेको छ ।
एमटीएले १ दशमलव ४ बिलियनका ५३२ वटा नयाँ ट्रेनका डिब्बाहरु ल्याउन लागेको हो । कावासाकी रेलकार इन्कले यी ट्रेनका डिब्बाहरु बनाइरहेको छ । तर कतिवटा ट्रेनका डिब्बाहरु नयाँ डिजाइनका हुनेछन् भन्नेबारे केही बताइएको छैन ।
यी ट्रेनका २० वटा डिब्बाहरु सन् २०२१ मा आइपुग्ने अपेक्षा गरिएको छ । यो बर्ष परिक्षणका लागि १० वटा डिब्बाहरु ल्याउन लागिएको छ । डिब्बाकाबीचमा ढोका नभएका र बाटोले डिब्बालाई जोडेका ट्रेनहरु विश्वका विभिन्न सबवे प्रणालीमा पहिलेदेखि नै संचालित छन् ।