ग्यास र बिजुलीको मूल्य झण्डै ९ प्रतिशतसम्म बढाउन न्युयोर्कले दियो स्वीकृति
प्रकाशित मिति : माघ २, २०७६ बिहीबार
न्युयोर्कको पब्लिक सर्भिस कमिसनले ग्यास र बिजुलीको मूल्य बढाउन कोन एडिसनलाई स्वीकृति दिएको छ । बिहिबार यस्तो स्वीकृति प्रदान गर्दै आगामी तीनबर्षका लागि मूल्य बढाउन अनुमति प्रदान गरिएको हो ।
सन् २०२० मा बिजुलीको मूल्य ३ दशमलव १ प्रतिशतले र ग्यासको मूल्य ६ दशमलव ७ प्रतिशतले बढाइने भएको छ । दोश्रो बर्ष सन् २०२१ मा बिजुलीको मूल्य ३ दशमलव ८ प्रतिशतले र ग्यासको मूल्य ७ दशमलव ३ प्रतिशतले बढाइने भएको छ ।
त्यस्तै सन् २०२२ मा बिजुलीको मूल्य ३ दशमलव ३ प्रतिशतले र ग्यासको मूल्य ६ दशमलव ५ प्रतिशतले बढाइने भएको छ ।
मासिक ६ सय किलोवाट आवरसम्म विद्युत प्रयोग गर्नेहरुले यो बर्ष ४ दशमलव २ प्रतिशत, सन् २०२१ मा ४ दशमलव ७ प्रतिशत र सन् २०२२ मा ४ प्रतिशत बृद्धिको सामना गर्नेछन् । ग्यासका सन्दर्भमा मासिक १ सय थर्म प्रयोग गर्नेहरुले यो बर्ष ७ दशमलव ५ प्रतिशत, आगामी बर्ष ८ दशमलव ८ प्रतिशत र सन् २०२२ मा ७ दशमलव २ प्रतिशत मूल्यबृद्धिको सामना गर्नेछन् ।
धेरै विद्युत र ग्यास प्रयोग गर्ने ब्यापारिक भवन र वेष्टचेस्टरमा भने यो बृद्धि अझ धेरै हुने जनाइएको छ । यो मूल्यबृद्धि कोन एडिसनका ग्राहकका सन्दर्भमा मात्र लागु हुनेछ ।