फ्लोरिडाको विमानस्थलको गेटमा अर्कैको बोर्डिङ पाससहित भेटिइन् हराइरहेकी बालिका
प्रकाशित मिति : पुस २९, २०७६ मंगलबार
हराइरहेकी एकजना बालिका फ्लोरिडाको ओर्लाण्डो विमानस्थलको जहाज चढ्ने गेटमा अर्कैको बोर्डिङ पाससहित भेटिएकी छिन् । उनले अर्कैको बोर्डिङ पास प्रयोग गरेर ट्रान्सपोर्टेशन सेक्युरिटी एडमिनिस्ट्रेशन टीएसएको सुरक्षा समेत पार गरेर विमान चढ्ने गेटमा पुगेको खुलासा भएको छ ।
अटिजमबाट पीडित १५ बर्षकी बालिका सेड सब्स साउथवेष्ट एयरलाइन्सको विमान चढ्ने गेटमा भेटिएकी थिइन् । भौतारिएको देखेपछि विमानस्थलका कर्मचारीले उनीसँग सोधपुछ गरेका थिए । जब उनले बोर्डिङ पास दिइन्, त्यो अर्कैको भएको र त्यसका यात्रु पहिले नै विमान चढेर गइसकेको खुलासा भएको थियो ।
त्यसपछि प्रहरीलाई खबर गरेपछि पुगेको प्रहरीले ती बालिका हराइरहेकी बालिका रहेको पत्ता लगाएको थियो । बालिकाले अर्कै यात्रुको बोर्डिङ पास भुईमा भेट्टाएपछि जहाज चढ्न टीएसएको सुरक्षा पार गरेर गएको बताएकी छिन् । बालबालिकाहरुका लागि आईडी देखाउन नपर्ने भएकाले उनी अर्कैको बोर्डिङ पासबाट भित्र छिर्न सफल भएको टीएसएले जनाएको छ ।
ती बालिकाले विमानस्थलसम्म पुग्न कैयन बसहरु प्रयोग गरेकी थिइन् । ३५ माइल लामो यात्रा गरेर विमानस्थल पुगेकी उनले आफूलाई जहाज चढ्न मन लागेकाले त्यहाँ गएको बताएकी छिन् ।
उनले आफू एसिया जान चाहेको र चीनिया फूलहरु हेर्न मन लागेको बताएकी थिन् । आफ्नी छोरी सकुशल घर फर्केकोमा परिवारले खुशी व्यक्त गरेका छन् ।