न्युयोर्कको आकाशमा हरियो बत्तिसहित बिष्फोट, उल्का रहेको आंशका


प्रकाशित मिति : पुस १६, २०७६ बुधबार

आइतबार राती न्युयोर्कको साराटोगा काउन्टीको आकाशमा हरियो बत्तिसहित बिष्फोट भएको देखिएको छ । राती पौने ११ बजेतिर बिष्फोट भएपछि प्रहरीले यसबारेका झण्डै ३० फोनकलहरु प्राप्त गरेको थियो ।

सर्वसाधारणहरुले ९११ मा फोन गरेर बिष्फोट र हरियो बत्तिबारे जानकारी दिएका थिए । बिष्फोटबाट घरहरु हल्लिनुका साथै आकाश अकस्मात हरियो देखिएको थियो ।

उक्त बिष्फोट उल्का भएको अनुमान गरिएको छ । सुरुमा प्रहरीले विद्युतको ट्रान्सफर्मर पड्केको अनुमान गरेको थियो । तर पछि ट्रान्सफर्मर नभएको पुष्टी भएको थियो ।

त्यसपछि प्रहरीले कुनै विमान दुर्घटनाभएको आशंकामा संघीय उडान प्रशासनमा सम्पर्क गरेको थियो । तर त्यहाँ त्यस्तो कुनै पनि घटना नभएको पुष्टी भएको थियो । राष्ट्रिय मौषम सेवालाई सम्पर्क गर्दासमेत त्यहाँ कुनै चट्यांग वा त्यस्तै घटना नभएको पुष्टी भएको छ ।

प्रहरीले त्यहाँ तारा खसेको वा उल्काबर्षा भएको हुनसक्ने अनुमान गरेको छ । ठूलो धातुजन्यपदार्थ आएर आकाशमा बिष्फोट भएको र हजारौं टुक्रा भएको प्रहरीको अनुमान छ ।

नासाले ठूलो उल्काहरुको अवलोकन गरिरहेकाले यो घटनाबाट नआत्तिन सर्वसाधारणहरुलाई आश्वस्त पारिएको छ । पृथ्वीमा तत्कालै त्यस्तो कुनै ठूलो उल्का ठोक्किने सम्भावना नरहेको समेत बताइएको छ ।

गतबर्ष न्युयोर्क सिटीमा रातीमा अचानक आकाशमा निलो किरण फैलिएपछि धेरैले उडन तस्तरी वा अन्य ग्रहको प्राणी हुनसक्ने भन्दै त्रास व्यक्त गरेका थिए । तर पछि प्रहरीले विद्युत ट्रान्सफर्मर पड्केको बताइएको थियो ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com