भर्जिनियामा ६३ वटा गाडी एकआपसमा ठोक्किदा कम्तीमा ५१ घाइते
प्रकाशित मिति : पुस ६, २०७६ आईतबार
भर्जिनियामा भएको दुर्घटनामा ६३ वटा गाडी एकआपसमा ठोक्किदा कम्तीमा ५१ जना घाइते भएका छन् । आइतबार विहान योर्क काउन्टीमा भएको दुर्घटनामा एउटा गाडीले अर्को गाडीलाई ठक्कर दिंदा ६३ वटा गाडीको खात लागेको थियो ।
दुर्घटनाको कारणबारे अनुसन्धान भइरहेको छ । तर प्रहरीले बाटोहरु चिप्लो भएको र हुस्सु लागेका कारण दुर्घटना भएको अनुमान गरेको छ । सुरुमा ३५ जनामात्र घाइते भएको जनाइएपछि दिउसोसम्म अस्पताल पुग्नेहरुको संख्या ५१ पुगेको थियो ।
घाइतेहरुमध्ये केहीको अवस्था सामान्य भएपनि केहीको अवस्था भने गम्भिर रहेको छ । तर कसैको पनि ज्यान नगएको प्रहरीले जनाएको छ । रिभरसाइड रिजनल मेडिकल सेन्टरमामात्र २५ जनाको उपचार भइरहेको छ ।