चिसो बढेपछि तिलोत्तमामा दाउरा वितरण
प्रकाशित मिति : पुस ३, २०७६ बिहीबार
शीतलहरबाट जनजीवन प्रभावित भएपछि तिलोत्तमा नगरपालिकाले विभिन्न स्थानमा आगो ताप्नका लागि दाउरा वितरण गरेको छ । नगरपालिकाले सामुदायिक वनहरुसँगको समन्वयमा दाउराको व्यवस्था मिलाएको हो । तिलोत्तमामा करहिया, शंकरनगर, बाउन्नकोटी, सुखौरा हरियाली, कालिका, मधुवनलगायतका सामुदायिक वनहरु छन् ।
नगर प्रमुख बासुदेव घिमिरेले सामुदायिक वन र प्रहरीसँगको समन्वयमा चिसोबाट नगरबासीलाई राहत दिलाउन विभिन्न स्थानमा आगो ताप्नका लागि दाउरा वितरण सुरु गरिएको बताए । करहिया सामुदायिक वन उपभोक्ता समूहका उपाध्यक्ष खिमानन्द न्यौपानेले शीतलहर प्रभावितलाई जोगाउन आगो बाल्न चोक चोकमा दाउरा बाड्न थालिएको जानकारी दिए । नगरपालिकाले सामुदायिक वनहरुलाई चिसोबाट बढी प्रभावित हुने समुदायलाई बढीभन्दा बढी लक्षित गरी दाउरा उपलब्ध गराउन आग्रह गरेको छ ।
यसैबीच तिलोत्तमा नगरपालिकाले चिसोले जनस्वास्थ्यमा गम्भीर असर पार्ने भन्दै न्यायो कपडाको जोहो समयमैं गर्न नगरबासीलाई आग्रह गरेको छ ।