ट्रम्पबिरुद्धको महाअभियोग प्रस्तावमा भोलि मतदान, ट्रम्पले पठाए यस्तो पत्र
प्रकाशित मिति : पुस १, २०७६ मंगलबार
अमेरिकी राष्ट्रपति डोनाल्ड ट्रम्पबिरुद्धको महाअभियोग प्रस्तावमा अमेरिकी संसदको तल्लो सदनमा भोलि पूर्ण मतदान हुने अपेक्षा गरिएको छ । त्यसका लागि हाउस प्यानलले नियमहरु तयार पारेको छ ।
यसैबीच राष्ट्रपति ट्रम्पले प्रतिनिधिसभाकी सभामुख न्यान्सी पेलोसीलाई एक आक्रमक पत्र पठाएका छन् । प्रतिनिधिसभाको पूर्ण सदनमा मतदान हुनुभन्दा एकदिन अगाडि मंगलबार ट्रम्पले ६ पृष्ठ लामो पत्र पठाएका हुन् । कोहीपनि बुद्धिमान व्यक्तिले डेमोक्र्याट्सहरुको कुरा विश्वास नगर्ने ट्रम्पले पत्रमा उल्लेख गरेका छन् ।
गतसाता अमेरिकी संसदको तल्लो सदन प्रतिनिधिसभाको न्यायिक समितिबाट पारित भएर अगाडि बढेको हो । सत्ताको दुरुपयोग र सदनको रुकावट लगायतका अभियोगसहितका दुईवटा प्रस्तावहरु संसदमा अगाडि बढाइएको छ ।
अमेरिकी राष्ट्रपति ट्रम्पको पत्रको पूर्ण पाठ
महाअभियोग प्रस्ताबका दुईवटा आर्टिकलहरुमध्ये एउटामा ट्रम्पले शक्तिको दुरुपयोग गरेर आफ्ना राजनीतिक प्रतिद्धन्दीमाथि अनुसन्धानका लागि युक्रेनलाई दवाव दिएको तथा अमेरिकी सुरक्षा सहायता र ह्वाइट हाउसको बैठक रोकेको आरोप लगाइएको छ । अर्कोमा गवाहहरुलाई रोकेर अनुसन्धानमा बाधा हालेको तथा उपस्थीतिका लागि दिइएको सुचना अवज्ञा गरेको आरोप लगाइएको छ ।
अब यी दुईवटै आर्टिकलहरु प्रतिनिधिसभामा मतदानमा लागि लगिने भएको छ । यदि प्रतिनिधिसभामा साधारण बहुमतबाट यो पारित भएमा ट्रम्प अमेरिकी इतिहासमा औपचारिक रुपमा महाअभियोग लगाइएका तेश्रो राष्ट्रपति हुनेछन् । यस अगाडि न्यायायिक समितिबाट महाअभियोग प्रस्ताव अगाडि बढेपछि रिचार्ड निक्सनले राजिनामा दिएका थिए ।
तल्लो सदनबाट पारित भएपछि अमेरिकी सिनेटमा सर्बोच्च अदालतका प्रधानन्यायाधिसको अध्यक्षतामा यसबारे परीक्षण हुनेछ । हाउसबाट पारित भएपनि महाअभियोग प्रस्ताव सिनेटबाट पारित हुने सम्भावना भने न्यून रहेको छ ।