नेपाली भूमि बचाउन पहल गरौं : कृष्ण पहाडी
प्रकाशित मिति : मंसिर २६, २०७६ बिहीबार
मानव अधिकारकर्मी कृष्ण पहाडीले नेपाली भूमि बचाउन सबैले पहल गर्नुपर्ने वताएका छन् । उनले नेपाली भूमिबाट भारतीय सेना फिर्ता हुनुपर्ने कुरामा समेत जोड दिए । मानवअधिकार तथा शान्ति समाज मुल आयोजक तयारी समिति दाङले शान्ति समाजको २२ औ राष्ट्रिय परिषद बैठकको पूर्वसन्ध्यामा तुलसीपुरमा गरेको पत्रकार सम्मेलनमा बोल्दै पहाडीले यस्तो वताएका हुन् ।
लिपुलेख, कालापानी, लिम्पीयाधुरा नेपाली भूमि भएको भन्दै त्यहाँबाट भारतीय सेना तत्काल फिर्ता लिनुपर्ने र नक्सा पनि सच्याउनु पर्ने बताउदै मानवअधिकारकर्मी पहाडीले नेपालीलाई आफनो स्वाभीमान सबैभन्दा प्रिय लाग्ने भएकाले कुनै सम्झौता नगर्ने वताए । आवश्यक परे नागरिक स्तरबाट समेत आन्दोलन गर्न तत्पर रहेको उनले वताएका थिए । आफुहरु भारत विरोधी नभएको स्पष्ट पार्दै पहाडीले भारतले पटक पटक नेपाली भूमि मिचेर अन्याय गरेकेो बताउदै प्रधानमन्त्रीले सोधै भारतीय प्रधानमन्त्री नरेन्द्र मोदीसंग वार्ता गरेर सिमा समस्या सधैका लागि टुङ्गयाउनु पर्नेमा उनको जोड थियो ।
मूल आयोजक तयारी समितिका अध्यक्ष शरद रेग्मीको अध्यक्षतामा भएको पत्रकार सम्मेलनमा शान्ति समाजका केन्द्रिय सभापति उत्तम पुडासैनी, बरिष्ठ उपसभापति गोविन्द खनाल, महासचिव सुशिल बस्नेत, पूर्व केन्द्रिय उपसभापति मोहन धिताल, निवर्तमान सभापति सुरेश हमाल लगाएतले बोलेका थिए । आजदेखि दुई दिनसम्म संचालन हुने २२ औ राष्ट्रिय परिषदको बैठकको सम्पूर्ण तयारी पुरा भएको आयोजकले बताएको छ । यसैविच शान्ति समाज मूलआयोजक तयारी समितिले लागुऔषध दुव्र्यसनी विरुद्धको सचेतना कार्यक्रम, रत्तदान, सरसफाई जस्ता कार्यक्रम गरिरहेको छ ।