पदक जित्ने खेलाडीलाई जनही ९ लाख दिने प्रधानमन्त्रीको घोषणा
प्रकाशित मिति : मंसिर २५, २०७६ बुधबार
सरकारले १३ औं दक्षिण एसियाली खेलकुद प्रतियोगितामा स्वर्ण पदक जित्ने खेलाडीलाई जनही ९ लाख रुपैयाँ दिने भएको छ ।
बुधबार बालुवाटारमा आयोजित कार्यक्रममा स्वर्ण विजेता खेलाडीलाई जनही ९ लाख रुपैयाँ पुरस्कार दिने घोषणा गरेको हो ।
त्यस्तै रजत जित्नेलाई ६ लाख र कांस्य जित्नेलाई ३ लाख दिने प्रधानमन्त्री केपी शर्मा ओलीले घोषणा गरेका छन् । काठमाडौंमा मंगलबार सकिएको सागमा नेपालले ५१ स्वर्ण, ६० रजत र ९५ कांस्यपदक प्राप्त गरेको थियो ।
तेह्रौँ सागमा नेपाली खेलाडीले धेरै कीर्तिमान कायम गरेका छन् । पौडी विधाका विभिन्न खेलमा गौरिका सिंहले चार वटा स्वर्ण जितेर यस क्षेत्रका सबै खेलाडी र प्रशिक्षकलाई छक्क तुल्याउनुभयो । उहाँ प्रतियोगिताकै सर्वाेत्कृष्ट खेलाडीका रूपमा सम्मान प्राप्त गर्न सफल हुनुभयो ।
कुस्ती विधामा सङ्गीता धामीले नेपालाई सागको इतिहासमै पहिलोपटक स्वर्णपदक दिलाउनुभयो भने एथलेटिक्सतर्फ सन्तोषी श्रेष्ठले छिटो दौडने महिलाको रेकर्ड बनाउनुभयो । नेपाली खेलाडीले खासगरी फुटबल, तेक्वान्दो, जुडो, कुस्ती, पौडी, साइक्लिङ, एथेलिटिक्स, ट्रायथलन र बक्सिङलगायतमा विधामा ऐतिहासिक जित हासिल गरे ।
कराँतेका मण्डेकाजीबाट नेपालका लागि खाता खोलिएको स्वर्ण पदकको शृङ्खला फुटबलमा सहित ५१ पुगेपछि स्थगन भएको थियो । सदस्य राष्ट्रका सबैको चासो र आकर्षको विधाका रूपमा रहेको फुटबलमा पनि नेपालले यसपटक बाजी मार्न सफल भयो ।
प्रतियोगितामा तेक्वान्दोकी आयशा शाक्य र गल्फका सुभाष तामाङले २–२ स्वर्ण पदक नेपाललाई दिलाउनुभयो । घरेलु मैदान, निरन्तर प्रशिक्षण, राष्ट्रप्रेम, अनुशासन, मेहनत र साहसले यसपटक नेपाली खेलाडीलाई सफलताको शिखर चुम्न सहयोग पु¥याएको थियो । छब्बीस खेल विधाका लागि ५९९ नेपाली खेलाडी र अरु सदस्य राष्ट्रका दुई हजार ९१० खेलाडीले प्रतियोगितामा भाग लिएका थिए ।
नेपालले यसपटक अहिलेसम्मकै कीर्तिमान तोडेर ५१ स्वर्ण, ६० रजत ९५ कास्यसहित २०६ पदक प्राप्त गर्न सफल भएको छ ।
कूल ३१६ स्वर्णसहित एक हजार ६३ पदकका लागि सार्क राष्ट्रका खेलाडीबीच भएको प्रतिस्पर्धामा भारतले १७४ स्वर्ण, ९३ रजत र ४५ कास्यमाथि कब्जा जमायो । सधैँ राजनीतिक समाचारलाई पहिलो पृष्ठ, प्रमुख हेडलाइन र स्थान दिँदै आएका नेपालका आमसञ्चारमाध्यमले १५ दिनयता निरन्तर १३औँ साग प्रतियोगितासम्बन्धी समाचार र तस्वीरलाई विशेष स्थान र महत्व दिएका थिए ।
खेल र खेलाडीको सफलताको गाथा समेटिएको समाचार प्रसारणभएसँगै अरु खेलाडीको मनोबलसमेत उच्च बन्न पुगेको थियो ।
यस प्रतियोगितामा नेपाली खेलाडीले ट्रायथलनमा दुई, कराँतेमा १०, तेक्वान्दोमा १२, उसुमा पाँच, एथेलेक्टिसमा तीन, साइक्लिङमा चार, बक्सिङमा तीन, पौडीमा चार, भारोत्तोलनमा दुई, कुस्तीमा एक, जुडोमा दुई, गल्फमा दुई र फुटबलमा एक स्वर्ण पदक प्राप्त गर्न सफल भए ।
राम्रो व्यवस्थापन हुनसक्ने हो भने तेक्वान्दो नेपाललाई ओलम्पिकमा मेडल जिताउन सक्ने खेल हो । नेपालले सन् १९९९ को आठौं सागबाट तेक्वान्दोमा निरन्तर सहभागिता जनाउँदै आएको छ।
सागको इतिहासमा तेक्वान्दोतर्फ दीपक विष्टले लगातार ४ पटक स्वर्ण जित्ने किर्तिमानी कायम गरेका थिए। दक्षिण एसियामा तेक्वान्दोतर्फ नेपाली खेलाडीहरुलाई तुलनात्मक रुपमा स्तरीय मानिन्छ।
तेह्रौँ सागमा ४० स्वर्ण, ८३ रजत र १२८ कास्यसहित श्रीलङ्काले तेस्रो स्थान प्राप्त गर्न सफल रह्यो भने पाकिस्तानले ३१ स्वर्ण, ४१ रजत र ५९ कास्य प्राप्त ग¥यो । प्रतियोगितामा बङ्गलादेशले १९ स्वर्ण, ३२ रजत र ८७ कास्य, माल्दिभ्सले १ स्वर्ण र ४ कास्य तथा भूटानले ७ रजत र १३ कास्य पदक हात पा¥यो ।