अमेरिकी नौसैनिक एयर स्टेशनमा गोली चलाउने व्यक्तिको अमेरिका र इजरालविरोधी ट्वीट
प्रकाशित मिति : मंसिर २१, २०७६ शनिबार
अमेरिकी नौसैनिक एयर स्टेशनमा तीनजनाको ज्यान जानेगरी गोली चलाउनले व्यक्तिले गोली चलाउनुअगाडि अमेरिका र इजरायलविरोधी ट्वीटहरु लेखेको जनाइएको छ । उक्त व्यक्तिले कक्षाकोठामा गोली चलाउँदा तीनजनाको मृत्यु भएको थियो, लगत्तै नौसैनिक अधिकारीको गोलीबाट उक्त व्यक्तिको पनि मृत्यु भएको थियो ।
गोली चलाउने उक्त साउदी नागरिकको ट्वीटर एकाउन्ट अहिले भने बन्द गरिसकिएको छ । मोहम्मद सायिम अल्सामरानी नामको उक्त व्यक्ति हवाई तालिम कार्यक्रममा सहभागी सेकेण्ड लेफ्टिनेन्ट भएको जनाइएको छ ।
विहानै कक्षा कोठामा प्रवेश गरेर गोली चलाउँदा तीनजनाको मृत्यु हुनुका साथै अरु कैयन घाइते भएका थिए । बन्दुक चलाउने व्यक्ति हवाई तालिमको एकजना विद्यार्थी रहेको र तालिमको प्रारम्भिक चरणमा रहेको जनाइएको छ । उक्त कक्षामा तालिमकर्ताहरुले झण्डै तीनमहिनाको कोर्स गर्दै आएका छन् ।
विदेशी विमान तालिममा सहभागी अधिकांश विद्यार्थीहरु साउदी अरबका नै रहेका छन् । नौसैनिक तालिम कार्यक्रममा १५ सय पाइलहरु सहभागी रहेका छन् । शुक्रबार भएको घटनामा ६ जना साउदी नागरिकहरुलाई नियन्त्रणमा लिएर छानविन गरिएको छ । तर घटना गराउनेसँगको सम्बन्ध पुष्टी भएको छैन ।
यसै साता अमेरिकी नौसैनिकको आधारमा भएको गोलीकाण्ड यो दोश्रो हो । बुधबारमात्र एकजना सिपाहीले हवाईमा दुईजना सर्वसाधारण कर्मचारीहरुको हत्या गरेर आफ्नै ज्यान लिएको घटना लगत्तै शुक्रबारको घटना भएको हो ।