रिपब्लिकन सांसदबाट सीएनएनबिरुद्ध ४३५ मिलियन डलरको मानहानीको मुद्दा
प्रकाशित मिति : मंसिर १८, २०७६ बुधबार
क्यालिफोर्नियाका रिपब्लिकन सांसद डेभिन नुन्सले सीएनएनबिरुद्ध ४३५ मिलियन डलरको मानहानीको मुद्दा दायर गराएका छन् । उनले संघीय अदालतमा मुद्दा दायर गर्दै उक्त रकम क्षतिपूर्तिको माग गरेका हुन् ।
सीएनएनलाई गलत समाचारको जननी भएको आरोप लगाउँदै उनले आफ्नाबिरुद्ध नोभेम्बर २२ मा गलत समाचार प्रकाशित भएको दावी गरेका छन् । समाचारमा जो बाइडेनबिरुद्ध हिलो छ्याप्ने अभियानमा नुन सहभागी भएको र पूर्व युक्रेनी अभियोजनकर्तालाई भियनामा भेटेको जनाइएको छ ।
४७ पृष्ठ लामो मुद्दामा उनले सन् २०१८ मा आफू कहिले पनि भियना नगएको जनाएका छन् । उक्त समयमा आफू लिबिया र माल्टामा रहेको उनको भनाई छ । मुद्दामा उनले आफ्नो यात्रा तस्वीरहरु समेत समावेश गरेका छन् ।
नुन्सले सन् २०१८ मा म्याक्केल्ची न्युजपेपर कम्पनीबिरुद्ध १५० मिलियन डलरको क्षतिपूर्ति दावी गर्दै मुद्दा हालेका थिए भने गत महिना एस्क्वायर पत्रिकाबिरुद्ध मुद्दा हालेका थिए । त्यस्तै मार्चमा ट्वीटरबिरुद्ध २५० मिलियन डलर क्षतिपूर्तिको माग गर्दै मुद्दा हालेका थिए ।