भ्रमण वर्ष र सडक खाना महोत्सवको प्रचार
प्रकाशित मिति : मंसिर १०, २०७६ मंगलबार
मंसिर १०, बुटवल । प्रदेश ५ सरकारले सुरु गरेको लुम्बिनी भ्रमण वर्षलाई सफल बनाउन र सडक खाना महोत्सवको प्रचारप्रसार गर्ने लक्ष्यसहित होटल तथा रेष्टुरेण्ट व्यवसायी संघ रुपन्देहीले जिल्लागत भ्रमण पूरा गरेको छ ।
संघका अध्यक्ष समुन्द्र जिसीको नेतृत्वमा ३७ सदस्यीय टोलीले कपिलवस्तु हुँदै वर्दियासम्मका जिल्लाको भ्रमण गरी भ्रमण वर्षलाई सफल बनाउन र सडक खाना महोत्सवको जानकारी गराएको हो ।
टोलीले कपिलवस्तुको चन्दौटा, दाङ्गको भालुवाङ्ग र लमही, बाँकेको नेपालगञ्ज र कोहलपुरका होटल व्यवसायी संघ तथा बर्दियाको ईको टुरिजम फोरमसंग अलगअलग भेटघाट गरी नेपाल भ्रमण वर्षलाई सफल बनाउन र सडक खाना महोत्सवको प्रचारप्रसार एवं निमन्त्रणा गर्ने काम गरेको भ्रमण दलका संयोजक तथा होटल तथा रेष्टुरेण्ट व्यवसायी संघ रुपन्देहीका महासचिव माधव कुमार खनालले बताए ।
लुम्बिनी भ्रमण वर्षलाई सफल बनाउन होटल व्यवसायीले खेल्नुपर्ने भूमिकाका बारेमा होटल तथा रेष्टुरेण्ट व्यवसायी संघ रुपन्देहीका अध्यक्ष समुन्द्र जिसी जिल्लामा आयोजित भेटघाट कार्यक्रममा जानकारी गराएका थिए ।
त्यसै गरी व्यवसायिक संस्था बीचको भगिनी सम्बन्ध, आन्तरिक पर्यटनको प्रवद्र्धन लगायतका विषयमा भ्रमणका क्रममा जानकारी गराइएको थियो ।
संघले आगामी पुष १४ गते देखि १६ गते सम्म ३ दिने बुटवलमा दोस्रो सडक खाना महोत्सव गर्ने कार्यक्रममा सहभागिताका लागि व्यवसायीहरुलाई निमन्त्रणा गर्नुका साथ महोत्सवको प्रचारप्रसार गरिएको संघका प्रथम उपाध्यक्ष बाब्राम गौतमले बताए । गत वर्षको अनुभवलाई मध्यनजर गरि यस वर्षको सडक खाना महोत्सवलाई थप व्यवस्थित गरिने महासचिव खनालले बताए । खाना महोत्सवमा २ लाख दर्शकलाई अवलोकन गराइ ३ करोडको कारोबार गर्ने लक्ष्य लिएको संघले जनाएको छ । –रवीन्द्र गुप्ताको सहयोगमा