डिसेम्बर २० सम्म सरकारी खर्च चलाउन विधेयक पारित, टर्यो सरकार शटडाउनको सम्भावना
प्रकाशित मिति : मंसिर ५, २०७६ बिहीबार
अमेरिकी सिनेटले सरकारी खर्च चलाउनका लागि अस्थायी खर्च विधेयक पारित गरेको छ । जसका कारण विहिबार रातीदेखि सरकार शटडाउन हुनसक्ने सम्भावना टरेको छ । अब यो विधेयकमा राष्ट्रपतिले हस्ताक्षर गरेका छन् । अब डिसेम्बर २० सम्म सरकार शटडाउन हुनेछैन ।
सरकारका संघीय निकाय संचालनका लागि सिनेटमा पेश गरिएको यो विधेयकका पक्षमा ७४ र विपक्षमा २० मत खसेको थियो । अमेरिकी संसदको तल्लो सदनले मंगलबार गत मंगलबार यो विधेयक पारित गरेको थियो ।
यो बर्षमात्र अमेरिकी संसदबाट सरकार शटडाउन हुनबाट जोगाउन दुईपटक अस्थायी खर्च विधयेक पारित भइसकेको छ । गत सेप्टेम्बर २७ मा ट्रम्पले सातहप्ता अर्थात् नोभेम्बर २१ सम्मका लागि अस्थायी खर्च विधेयकमा हस्ताक्षर गरेका थिए ।
सरकार शटडाउन भएमा अमेरिकाका कैयन संघीय निकायहरु बन्द गर्नुपर्ने अवस्था आउँछ । अमेरिकी अध्यागमन अदालतदेखि विभिन्न निकायहरु बन्द हुँदा त्यसबाट सर्वसाधारणमा समेत प्रत्यक्ष मार पर्छ ।
गत बर्ष सरकार शटडाउन हुँदा एसाइलमका अदालती बर्षौपछि सरको थिए, जसबाट कैयन नेपालीहरु प्रभावित भएका थिए । शटडाउनका अधिकांश अध्यागमन अदालतहरु बन्द भएपछि शटडाउनको समयमा तोकिएका एसाइलमका सुनुवाईहरु स्थगीत भएका थिए ।
सरकारी शटडाउन भएमा अमेरिकी विदेश मन्त्रालय, न्याय, अर्थ, यातायात र होमल्याण्ड सेक्युरिटीका कैयन कर्मचारीहरु यसबाट प्रभावित हुन्छन् । झण्डै २१ लाख कर्मचारीहरुमध्ये कुनै न कुनै रुपमा झण्डै ८ लाख कर्मचारीहरु प्रभावित हुन्छन् र आधाजस्तो कर्मचारीहरु विना तलव घरमा बस्नुपर्ने अवस्था आउँछ ।
सरकार शटडाउनका हुँदा आइआरएस बन्द हुन्छ । जसबाट ट्याक्सको काम प्रभावित हुन्छ । सबै संघीय आयोगहरुका फोनकलहरु उठ्दैनन् । पार्क, संग्राहालय र राष्ट्रिय चिडियाघरहरु बन्द हुन्छन् । तर युएससीआईएस, हुलाक लगायतका सेवाहरु भने सुचारु नै हुन्छन् ।