एक इन्च पनि नेपाली भूमि कसैलाई मिच्न दिँदैनौँ : प्रधानमन्त्री ओली
प्रकाशित मिति : मंसिर १, २०७६ आईतबार
मंसिर ०१, काठमाडौँ । प्रधानमन्त्री केपी शर्मा ओलीले एक इन्च नेपाली भूमि पनि कसैलाई मिच्न नदिने र अरूको भूमि पनि आफूलाई नचाहिने बताएका छन् । आइतवार सत्तारूढ नेकपाको भातृसङ्गठन युवा सङ्घको राष्ट्रिय एकता भेलालाई सम्बोधन गर्दै ओलीले नेपाली भूमिबाट विदेशी सेना फिर्ता हुनुपर्ने बताउँदै यो सरकार आफ्नो अतिक्रमित भूमि फिर्ता लिन सक्षम रहेको जिकिर गरेका छन् ।
हामीलाई अरूको जमिन चाहिएन । हाम्रो जमिनबाट हाम्रा छिमेकीहरूले सेना फिर्ता लैजाऊन् । हाम्रो जमिनमा सेना नराख्नुहोस फिर्ता लानुहोस्, हाम्रो आग्रह छ, उनले भने । प्रधानमन्त्री ओलीले विश्व शान्तिका लागि नेपाली सेना पठाइने गरेको स्मरण गर्दै नेपाल शान्तिको पक्षमा रहेको र छिमेकीसँग तनाव नहोस् भन्ने चाहेको पनि बताए ।
‘हामी आफ्नो भुमी एक इन्च पनि मिच्न दिदैनौ । अरुको जमिन चाहिदैन । तर हाम्रो जमिनबाट सेना फिर्ता लैजानुस् । सरकार सम्वाद गर्न नसक्ने अवस्थामा छैन र विदेशी फौज फिर्ता गराउँछ । सीमा अहिले मिचिएको होइन । तर यो विषयमा अहिले राष्ट्रिय एकता कायम गर्न हामी सफल भएका छौं’ ओलीले भने ।
प्रधानमन्त्री ओलीले राष्ट्रियताको पक्षमा सबै दल र जनता एकजुट हुँदा सरकारलाई सजिलो भएको बताए ।