सान डिएगो नरसंहार : छाडेकी श्रीमति र ४ बालकलाई गोली हानेपछि आफैलाई गोली
प्रकाशित मिति : कार्तिक ३०, २०७६ शनिबार
शनिबार विहान सान डिएगो प्याराडाइज हिल क्षेत्रमा भएको गोलीकाण्डमा ३१ बर्षीय पुरुषले सम्बन्ध बिग्रिसकेकी श्रीमति र ४ बालकलाई गोली हानेपछि आफैलाई गोली हानेको प्रहरी अनुसन्धानले पुष्टी गरेको छ । उक्त व्यक्तिले २९ बर्षीय महिला र चारजना बालकलाई गोली हानेपछि आफैलाइै गोली हानेका थिए ।
आफ्नो टाउकोमा आफै गोली हानेका उनको घटनास्थलमा नै मृत्यु भएको थियो । त्यस्तै महिला र ३ बर्षका बालकको पनि घटनास्थलमा नै मृत्यु भएको थियो । ५ र ९ बर्षका दुईजना बच्चालाई अस्पताल लगिएको थियो । उनीहरुको उपचारका क्रममा मृत्यु भएको थियो । अर्का एकजना ११ बर्षीय बालकको भने अस्पतालमा उपचार भइरहेको छ ।
गोली हान्ने व्यक्ति ती महिलाका सम्बन्ध विग्रिएका पति रहेको पुष्टी भएपनि ती व्यक्ति बालकका पिता भए नभएको भने जानकारी प्राप्त भएको छैन । पारिवारिक विवादका कारण घटना भएको अनुसन्धानबाट खुलेको छ ।
शनिबार विहान भएको घटनामा ७ बजे घटनास्थलमा प्रहरी पुग्दा ६ जनामाथि गोली लागेको पाइएको थियो जसमध्ये ५ जना मृत अवस्थामा रहेका थिए । घटनाको जानकारी पाएको एकमिनेटभित्रै प्रहरी पुगेको थियो । अगाडिको ढोकाबाट कुनै रेस्पोन्स प्राप्त नभएपछि प्रहरीले पछाडिको झ्यालबाट भित्रको दृश्य हेर्दा एकजना बालक रगतमा लतपतिएको देखेको थियो ।
घटनास्थलबाट एउटा हातेबन्दुक बरामद भएको छ । घटनास्थल एलिमेन्टरी स्कुल नजिकै रहेको छ ।