लुकाएर राखेको अबस्थामा दाङमा अत्याधुनिक हतियार फेला
प्रकाशित मिति : कार्तिक ३०, २०७६ शनिबार
कार्तिक ३०, दाङ । लुकाएर राखेको अबस्थामा दाङमा अत्याधुनिक हतियार फेला परेको छ । प्रहरीका अनुसार दाङबाट कपिलवस्तु स्थानान्तरण गर्न लागिएको अत्याधुनिक हतियार छाडेर नेत्र विक्रम चन्द विप्लव नेतृत्वको नेपाल कम्युनिस्ट पार्टीका कार्यकर्ताहरु भागेका छन् । बेवारिसे अवस्थामा हतियार तथा गोली गठ्ठा फेला परेको प्रहरीले जनाएको छ ।
जिल्ला प्रहरी कार्यालय दाङले गढवा गाउँपालिका र कपिलवस्तुको शिवनगरको सीमा क्षेत्रमा रहेका खाली गोठमा लुकाइछिपाइ राखेका अवस्थामा पाँच थान अत्याधुनिक सर्ट मेसिन गन (एसएमजी), त्यसमा प्रयोग हुने १३ थान म्यागजिन तथा उक्त राइफलमा प्रयोग हुने ३९० थान गोली बरामद गरेको हो । प्रदेश प्रहरी कार्यालय दाङबाट विशेष सूचनाको आधारमा प्रदेश ५ प्रहरी कार्यालय, जिल्ला प्रहरी कार्यालय दाङ तथा इलाका प्रहरी कार्यालय गढवाको संयुक्त गस्ती टोलीले शुक्रबार बेलुकी करिब ६ बजे शिवनगर–१ मा रहेको खाली गोठबाट रातो सुटकेसमा राखिएका उक्त हातहतियार बरामद गरिएको जिल्ला प्रहरी कार्यालय दाङका प्रहरी उपरीक्षक जनक भट्टराईले शनिबार पत्रकार सम्मेलन गरी जानकारी दिए । प्रहरीले यसअघि राजपुर–४ मगरैनाबाट विप्लवका केन्द्रीय नेतासहित २१ जनालाई पक्राउ गरेको थियो । घटनाको सम्बन्धमा थप अनुसन्धान भइरहेको प्रहरीले जनाएको छ ।