१४ पटक सांसद जितेका न्युयोर्कका बरिष्ठ रिपब्लिकन पिटर किङ अब सांसदमा नउठ्ने
प्रकाशित मिति : कार्तिक २५, २०७६ सोमबार
१४ कार्यकाल अमेरिकी संसदको प्रतिनिधिसभामा चुनाव जितेका न्युयोर्कका बरिष्ठ रिपब्लिकन राजनीतिज्ञ पिटर किङ अब सांसदमा चुनाव नलड्ने भएका छन् । होमल्याण्ड सेक्युरिटी कमिटिका पूर्वअध्यक्ष समेत रहेका उनले आगामी बर्षको चुनावमा नउठ्ने बताएका छन् ।
७५ बर्षका पिटर किङले पत्नी र छोराछोरीहरुसँगको छलफलपछि राजनीतिबाट सन्यास लिने निष्कर्षमा पुगेको बताएका छन् । २८ बर्षसम्म हप्ताको ४ दिन वासिंटन डिसीमा बिताइसकेपछि अब हरेकहप्ताको आवतजावत अन्त्य गरेर घरमै बस्ने बेला भएको उनले बताएका छन् ।
उनले साउथ सोर लङ आइल्याण्ड डिस्ट्रिक्टको प्रतिनिधित्व गर्दै आएका छन् । जसमा नासु र सफोक काउन्टीसमेत पर्छ । सन् २०१८ मा उनले ५३ प्रतिशतमात्र मत ल्याएर सांसदमा निर्वाचित भएका थिए, जुन सन् १९९२ देखि उनी निर्वाचित भएको सबैभन्दा कम मत प्रतिशत हो ।
उनले राजनीतिक रुपमा भने सकृय नै रहने बताएका छन् । भाग्यशाली जीवनको अर्को खण्डमा आउने चुनौती र अवशरका लागि आफू प्रतिरक्षारत रहेको उनले बताएका छन् ।
उनले आगामी बर्ष चुनाव नलड्ने बताइरहदा यसभन्दा अगाडि प्रतिनिधिसभाका १९ रिपब्लिकन सदस्यहरुले त्यस्तो घोषणा गरिसकेका छन् । ८ डेमोक्र्याट्सहरुले पनि आगामी चुनावमा उम्मेदवारी नदिने बताएका छन् ।