टीपीएस प्राप्त झण्डै ४ हजारलाई देश छाड्ने तयारी गर्न अमेरिकी चेतावनी

टीपीएस प्राप्त तीनदेशका झण्डै ४ हजार नागरिकलाई अमेरिका छाडेर स्वेदश फर्कने तयारी गर्न अमेरिकी सरकारले चेतावनी दिएको छ । गायना, लाइबेरिया र सिरिया लिओनका नागरिकलाई अमेरिकामा प्रदान गरिएको टीपीएसको अवधि नथपिएपछि टीपीएसप्राप्त ती देशका नागरिकहरु अब स्वदेश फर्कनुपर्ने भएको छ ।

ती देशका नागरिकहरुलाई अमेरिकामा प्रदान गरिएको टीपीएसको अवधि आगामी मे २१ मा समाप्त हुँदैछ । इबोला भाइरसका कारण ती देशका नागरिकहरुलाई अमेरिकामा टीपीएस प्रदान गरिएको थियो । तर अब इबोलाको खतरा नरहेको भन्दै टीपीएसको अवधि थपिएको छैन । टीपीएसको अवधि नथपिएपछि टीपीएस प्राप्त ती देशका नागरिकहरु अमेरिकामा समस्यामा पर्ने भएका छन् ।

सिरिया लिओनका ११८० जना, गायनाका ९३० जना र लाइबेरियाका २१६० जनाले अमेरिकामा टीपीएस लिएका छन् । उनीहरुसँग आगामी मे २१ भित्र अरु इमिग्रेशन स्टेटस नरहेको अवस्थामा अमेरिका छाड्ने तयारी गर्न वा अन्य इमिग्रेशन सुविधाका लागि आवेदन दिन अमेरिकी सरकारले सुचित गरेको छ ।

आगामी मे २१ मा टीपीएसको अवधि सकिने र अरु कुनै कानुनी स्टेटस नभएकाहरु देशनिकाला हुनबाट संरक्षित नहुने युएससीआईएसले जनाएको छ ।

अमेरिकामा ८ हजार ९ सय ५० जना नेपालीहरु टीपीएसबाट संरक्षित छन्, जसको अवधि सन् २०१८ को जुन २४ मा सकिदैछ । टीपीएसको अवधि नथपिएमा अन्य कानुनी स्टेटसका लागि आवेदन नदिएका वा नपाएका नेपालीहरुले पनि सन् २०१८ को जुन २४ पछि अमेरिका छाड्नुपर्नेछ ।

बिहिबार, बैशाख ७, २०७४ मा प्रकाशित

सम्बन्धित सामाग्री

Like us on Facebook