एक लाखले गराए गर्भपतन, सबैभन्दा बढी काठमाडौंमा !
प्रकाशित मिति : आश्विन १०, २०७६ शुक्रबार
रिया भण्डारी/ नेपालमा आर्थिक वर्ष २०७५\७६ मा करिब एक लाखले गर्भपतन गराएका छन् । यसमध्ये ११ प्रतिशत किशोरी रहेको स्वास्थ्य सेवा विभाग परिवार कल्याण महाशाखाले जनाएको छ । सबैभन्दा बढी गर्भपतन काठमाडौंमा भएको छ ।
गर्भपतन प्रत्येक बर्ष बढ्दै गएको छ, त्यसमा पनि असुरक्षित गर्भपतन बढेको चिकित्सकहरु बताउछन् । आर्थिक बर्ष २०७५\७६ मा नेपाल सरकारबाट सुरक्षित गर्भपतन गराउने संस्थाहरु बाट मात्र गर्भपतन गराउने ९५ हजार ३ सय ६९ जना छन् ।
यस बाहेक अवैध रुपमा गर्भपतन गराउनेको संख्या अझ बढी हुनसक्ने बिशेषज्ञको अनुमान छ । कतिपय महिलाले आँफै मेडिकलबाट औषधि किनेर खाने र गर्भपतन गराउनेसम्म गरिरहेका छन्, यसले गर्दा गर्भपतन गराउनेको संख्या अझ धेरै हुन् सक्ने बिज्ञको अनुमान छ ।
पछिल्लो समय अप्रत्याशित रुपमा बढिरहेको गर्भपतनले नेपालको मातृ मृत्युदर बढाउने जोखिम पनि बढेको छ । कम उमेरमै गर्भपतन गराउदा महिलाको स्वास्थ्यमा दिर्घकालिन रुपमै गम्भीर असर पर्छ ।
गर्भपतन गर्नु स्वास्थ्यलाई जोखिम त छ नै त्यसमा पनि कलिलैमा गर्भपतन गर्दा अझ बढी जोखिम हुन्छ । २० बर्षमुनिका महिलाले गर्भपतन गर्दा, धेरै पटक गर्भपतन गरेमा पाठेघर पातलो हुने, फुट्ने, पाठेघरमा बच्चा बसिहालेमा पनि नरहने, बच्चा नै नबस्ने लगायतका समस्या आउन सक्छ ।
त्यस्तै, गर्भपतनका कारण कयौं महिलामा मानसिक असर समेत पर्ने चिकित्सकहरुले बताएका छन् । गर्भपतन गर्दा धेरै रक्तश्राप भएर ज्यानै जान सक्ने हुनसक्छ । गर्भपतन गर्नु पर्ने अवस्था नै आउन नदिन यौन सम्पर्कका बेला परिवार नियोजनका साधन प्रयोग गर्नु पर्छ ।