अमेरिकामा विमानभित्र यात्रुको अचम्मको हर्कत, विमान नै गर्नु पर्यो आकस्मिक अवतरण
प्रकाशित मिति : १६ जेष्ठ २०८३, शनिबार
तस्बिर: डेभिड साइफर्स / अनस्प्लास
अमेरिकामा एक यात्रुले ककपिटमा प्रवेश गर्ने प्रयास गरेपछि युनाइटेड एयरलाइन्सको विमान आकस्मिक रूपमा अवतरण गर्नु परेको छ।
शिकागोबाट मिनियापोलिसतर्फ उडेको युनाइटेड एयरलाइन्सको विमानमा एक यात्रुले बारम्बार ककपिटमा प्रवेश गर्ने प्रयास गरेपछि सुरक्षा चिन्ता उत्पन्न भएको थियो। त्यसपछि विमानलाई निर्धारित गन्तव्यमा नलगी विस्कन्सिन राज्यको म्याडिसन सहरमा आकस्मिक रूपमा अवतरण गराइएको थियो।
युनाइटेड एयरलाइन्सका अनुसार उक्त घटनामा विमानभित्र रहेका सुरक्षाकर्मीहरूले ती यात्रुलाई नियन्त्रणमा लिएपछि अवस्था सामान्य बनेको थियो। हवाई यातायात नियन्त्रण केन्द्रसँग भएको संवादअनुसार ती यात्रुले ककपिटको ढोकानजिक पुगेर धेरै पटक प्रवेश गर्ने प्रयास गरेका थिए। त्यसपछि विमानमा यात्रा गरिरहेका सुरक्षा अधिकारीहरूले उनलाई नियन्त्रणमा लिएका थिए।
विमान म्याडिसनमा सुरक्षित रूपमा अवतरण गरेपछि स्थानीय प्रहरीले ती यात्रुलाई हिरासतमा लिएको छ। घटनाबारे सङ्घीय अनुसन्धान ब्युरो ‘एफबीआई’ ले पनि अनुसन्धान सुरु गरेको जनाएको छ।
विमानमा यात्रा गरिरहेका यात्रु माइक रन्डलका अनुसार यो घटना उडानका क्रममा अचानक भएको थियो। उनले भने, “एक यात्रु ककपिटनजिक पुगेर विमान परिचारिकातर्फ हात बढाउन खोजेको देखेपछि केही यात्रुहरूले उनलाई रोक्ने प्रयास गरेका थिए।” रन्डलका अनुसार उनले आफूभन्दा केही सिटअगाडि हलचल भएको देखेका थिए। त्यसपछि केही व्यक्तिले ती यात्रुलाई पुनः आफ्नो सिटमा फर्काएका थिए।
घटनापछि विमानले आफ्नो मार्ग परिवर्तन गर्दै म्याडिसनतर्फ मोडिएको थियो। अवतरण गरेलगत्तै प्रहरी विमानभित्र प्रवेश गरी ती व्यक्तिलाई हतकडी लगाएर बाहिर लगेका थिए।
रन्डलका अनुसार विमान उड्नुअघि शिकागोको ओ’हेयर अन्तर्राष्ट्रिय विमानस्थलमा पनि ती यात्रुले असामान्य व्यवहार देखाएका थिए। विमान धावनमार्गतर्फ जाँदै गर्दा उनी बारम्बार सिटबाट उठेका थिए। विमानका कर्मचारीहरूले उनलाई पटक–पटक बस्न आग्रह गरेका थिए।
त्यसपछि विमानका कर्मचारीहरूले विमानमा रहेका कसैले रुसी भाषा बोल्न सक्ने भए अगाडि आउन अनुरोध गरेका थिए। केही समयपछि ती व्यक्ति आफ्नो सिटमा बसेका थिए र विमानले उडान भरेको थियो।
उक्त बोइङ ७३७ विमानमा १४७ यात्रु र ६ जना चालक दलका सदस्य सवार थिए। एयरलाइन्सका अनुसार विमान सुरक्षित रूपमा अवतरण भएको र घटनामा कोही पनि घाइते नभएको जनाएको छ।
अमेरिकी सङ्घीय उड्डयन प्रशासन का अनुसार यस वर्ष मात्रै विमानभित्र यात्रुहरूको अनुशासनहीन व्यवहारसम्बन्धी ६४० भन्दा बढी घटना दर्ता भइसकेका छन्।
प्रशासनले यात्रुहरूले विमानका कर्मचारीमाथि आक्रमण गर्ने, धम्की दिने, डर देखाउने वा काममा बाधा पुर्याउने घटनाको अनुसन्धान गर्ने र दोषी ठहरिएमा प्रतिउल्लङ्घन करिब ४३ हजार ६ सय ५८ अमेरिकी डलरसम्म जरिवाना गर्न सकिने जनाएको छ।