२ मंसिर २०८३, बुधबार| Wednesday, November 18, 2026
अमेरिका

अमेरिकामा बाल यौन शोषणको षड्यन्त्रमा दोषी २१ वर्षीय प्रसन नेपाललाई मार्च ५ मा सजाय सुनाइने

‘७६४’ नामक हिंसात्मक अतिवादी सञ्जाल सञ्चालनमा नेतृत्वदायी भूमिका खेलेका २१ वर्षीय नेपाललाई कम्तीमा १५ वर्षदेखि अधिकतम ३० वर्षसम्म संघीय जेल सजाय हुन सक्ने

अमेरिकामा बालबालिकालाई अनलाइनमार्फत यौन शोषण, धम्की र हिंसात्मक गतिविधिमा संलग्न गराउने अन्तर्राष्ट्रिय अतिवादी सञ्जाल ‘७६४’ का एक प्रमुख नेता प्रसन नेपालले आफूमाथि लागेको आपराधिक षड्यन्त्रसम्बन्धी अभियोग स्वीकार गरेगरेपछि मार्च ५ मा सजाय सुनाइने भएको छ। अमेरिकाको डिस्ट्रिक्ट अफ कोलम्बियास्थित संघीय अदालतमा उनले बालबालिकाको यौन शोषण गर्ने षड्यन्त्र गरेको स्वीकार गरेका हुन्।

नर्थ क्यारोलाइनाको हाई प्वाइन्टमा बस्दै आएका २१ वर्षीय नेपाललाई संघीय अदालतले मार्च ५, २०२७ मा सजाय सुनाउने मिति तोकेको छ। न्यायाधीश रेगी बी. वाल्टनसमक्ष उनले अभियोग स्वीकार गरेका हुन्। अमेरिकी कानुनअनुसार उक्त अपराधमा उनलाई कम्तीमा १५ वर्ष र अधिकतम ३० वर्षसम्म संघीय कारागार सजाय हुन सक्छ।

अमेरिकाका डिस्ट्रिक्ट अफ कोलम्बियाका लागि अमेरिकी महान्यायाधिवक्ताको कार्यालयले जारी गरेको विज्ञप्तिअनुसार नेपाल अनलाइनमा ‘ट्रिप्पी’ नामबाट परिचित थिए। उनी ‘७६४’ नामक हिंसात्मक अतिवादी सञ्जालका वरिष्ठ नेतृत्वकर्तामध्ये एक थिए। उनीसँगै ‘वार’ नामबाट चिनिने लियोनिडास वरागियानिसले उक्त सञ्जाल र त्यसको आन्तरिक समूह ‘७६४ इन्फर्नो’ सञ्चालनमा प्रमुख भूमिका खेलेका थिए।

अदालतमा पेस गरिएका कागजातअनुसार सन् २०२१ देखि २०२५ सम्म नेपाल र उनका सहकर्मीहरूले इन्क्रिप्टेड अनलाइन प्लेटफर्म प्रयोग गरेर विभिन्न देशका नाबालिगलाई लक्षित गरी यौन शोषण, धम्की, जबर्जस्ती र मनोवैज्ञानिक यातनाका गतिविधि सञ्चालन गरेका थिए। उनीहरूले समूहका सदस्य भर्ती गर्ने, सदस्यहरूको गतिविधि निगरानी गर्ने, समूहका नियम लागू गराउने र शोषणसँग सम्बन्धित सामग्री उत्पादन तथा वितरण गर्ने कामको समन्वय गर्थे।

अनलाइनबाट नाबालिगलाई लक्षित गर्ने संगठित सञ्जाल

अमेरिकी अभियोजनकर्ताहरूका अनुसार ‘७६४’ सामान्य अनलाइन समूह मात्र थिएन। यसले हिंसा, सामाजिक अराजकता र समाजको विघटनलाई आफ्नो वैचारिक आधार बनाएको थियो। समूहका सदस्यहरूले विशेषगरी अनलाइनमा कमजोर अवस्थामा रहेका बालबालिका तथा किशोरकिशोरी पहिचान गरी उनीहरूलाई मनोवैज्ञानिक रूपमा प्रभावित गर्ने र पछि धम्की तथा जबर्जस्तीमार्फत शोषण गर्ने रणनीति अपनाउँथे।

समूहमा सदस्य बन्न चाहने व्यक्तिले समेत समूहको उद्देश्यअनुसार हिंसात्मक वा शोषणजन्य सामग्री तयार गर्नुपर्ने व्यवस्था थियो। त्यस्ता सामग्री उत्पादन गर्न सहमत हुने व्यक्तिले समूहभित्र उच्च हैसियत पाउँथे भने अस्वीकार गर्नेहरूलाई बाहिर राखिन्थ्यो।

अदालतमा पेस गरिएका विवरणअनुसार नेपाल र वरागियानिसले सदस्यता नियन्त्रण गर्ने, नयाँ सदस्यको गतिविधि अनुगमन गर्ने र समूहको प्रभाव विस्तार गर्न निर्देशन दिने गर्थे। उनीहरूले नयाँ सदस्यलाई नाबालिगसँग कसरी सम्बन्ध स्थापित गर्ने, उनीहरूको विश्वास जित्ने र त्यसपछि शोषणका लागि कसरी दबाब सिर्जना गर्ने भन्ने तरिकासमेत सिकाउने गरेका थिए।

अनुसन्धानका क्रममा अमेरिकी अधिकारीहरूले नेपाल र वरागियानिससँग सम्बन्धित एक दर्जनभन्दा बढी सक्रिय सहअभियुक्तको पहिचान गरेका छन्। उनीहरूमध्ये धेरैले नक्कली नाम प्रयोग गरी इन्क्रिप्टेड समूह च्यानलमार्फत नियमित सम्पर्क गर्ने गरेका थिए।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →

कम्तीमा आठ नाबालिग पीडित भएको दाबी

अदालतमा पेस गरिएको अभियोगसम्बन्धी विवरणअनुसार नेपाल र उनका सहषड्यन्त्रकारीहरूले विभिन्न क्षेत्रका कम्तीमा आठ जना नाबालिगलाई शोषण गरेका थिए। पीडितमध्ये केहीसँग सम्बन्धित सामग्री १३ वर्षसम्मका बालबालिकासँग जोडिएको थियो। समूहको गतिविधि सन् २०२० को अन्त्यदेखि सन् २०२५ को सुरुवातसम्म फैलिएको अभियोजनकर्ताहरूको भनाइ छ।

समूहका सदस्यहरूले बाल यौन दुर्व्यवहारसम्बन्धी सामग्री, शारीरिक हिंसा र यातनासम्बन्धी दृश्यलाई डिजिटल सम्पत्तिका रूपमा प्रयोग गर्थे। त्यस्ता सामग्रीलाई ‘लोरबुक्स’ नामका डिजिटल सङ्ग्रहमा राखिन्थ्यो। ती सामग्री समूहभित्र सदस्यहरूको हैसियत बढाउने, नयाँ सदस्य भर्ती गर्ने र आपसी लेनदेनको माध्यम बन्ने गरेका थिए।

अभियोजनका अनुसार सदस्यहरूले त्यस्ता सामग्री इन्क्रिप्टेड डिजिटल भण्डारमा सुरक्षित राख्ने र समूहभित्र एकअर्कालाई उपलब्ध गराउने गर्थे। सामग्रीको गम्भीरता र त्यसको उत्पादनमा सदस्यले खेलेको भूमिकाका आधारमा समूहभित्र उनीहरूको प्रतिष्ठा निर्धारण हुने गरेको थियो।

अदालतमा पेस गरिएका कागजातमा पीडितलाई आत्महानी गर्न बाध्य पार्ने, अनलाइन तथा प्रत्यक्ष यौन गतिविधिमा संलग्न गराउने, जनावरमाथि हिंसा गर्न लगाउने, परिवारका अन्य सदस्यलाई समेत शोषणमा तान्ने र आत्महत्या तथा हत्यासम्मका धम्की दिने घटनाहरू उल्लेख छन्।

एउटा डिजिटल सामग्रीमा १५ वर्षीया एक पीडित किशोरी अनलाइन लाइभ च्याटमा कसैसँग कुराकानी गरिरहेको अवस्थामा देखिएको थियो। उक्त सामग्रीमा उनले आफ्नो शरीरमा ब्लीच खन्याएको र हातमा आगो लगाएको दृश्यसमेत रहेको अमेरिकी अभियोजनकर्ताहरूले अदालतमा पेस गरेका विवरणमा उल्लेख गरेका छन्। अर्को सामग्रीमा भित्तामा रातो रङले ‘७६४ किल्स’ लेखिएको देखिएको थियो।

यी सामग्रीको उल्लेख पीडितमाथि भएको गम्भीर दुर्व्यवहारको प्रमाणका रूपमा अभियोजन पक्षले अदालतमा गरेको हो।

सन् २०२१ देखि नेतृत्वमा, २०२५ मा पक्राउ

अदालतका कागजातअनुसार नेपाल सन् २०२१ को सुरुवाततिर ‘७६४’ समूहमा आबद्ध भएका थिए। समूहका प्रारम्भिक सदस्यहरूमध्ये एक व्यक्तिलाई अगस्ट २५, २०२१ तिर पक्राउ गरिएपछि नेपाल समूहको नेतृत्वमा उदाएका थिए। उनी अप्रिल २०२५ सम्म नेतृत्वदायी भूमिकामा रहेको अभियोजन पक्षको विवरणमा उल्लेख छ।

नेपालले ‘ट्रिप्पी’ बाहेक ‘लेदर ज्याकेट’, ‘रिबर्थ’, ‘इन्द्राज जेस्टर’ र ‘किङ क्र्याम्पस’ जस्ता अनलाइन नामसमेत प्रयोग गर्ने गरेका थिए।

सन् २०२५ मा नेपाललाई पक्राउ गरिएको थियो। त्यसपछि उनी र वरागियानिसविरुद्ध अन्तर्राष्ट्रिय अनुसन्धानका क्रममा मुद्दा अघि बढाइएको थियो। अनुसन्धानमा वासिङ्टनस्थित संघीय अनुसन्धान ब्युरो (एफबीआई) को कार्यालयसँगै अमेरिकाका विभिन्न राज्यका अनुसन्धान निकाय र विदेशी कानुन कार्यान्वयन गर्ने निकायहरू संलग्न थिए।

नेपालले अभियोग स्वीकार गरे पनि उनका सहअभियुक्त वरागियानिसको मुद्दा भने अझै बाँकी छ। उनी हाल उत्तरी ग्रिसको ग्रेभेना कारागारमा थुनामा रहेको अमेरिकी अधिकारीहरूले बताएका छन्। उनीमाथि बाल अश्लील सामग्री र आपराधिक संगठनमा संलग्नतासम्बन्धी अभियोगमा आगामी छ महिनाभित्र मुद्दाको सुनुवाइ हुने अपेक्षा गरिएको छ।

अमेरिकी अभियोजनकर्ताको चेतावनी

अमेरिकाका लागि डिस्ट्रिक्ट अफ कोलम्बियाका अमेरिकी महान्यायाधिवक्ता जिनिन फेरिस पिरोले नेपालले अभियोग स्वीकार गरेको घटनालाई बालबालिकाको अनलाइन शोषणविरुद्धको महत्त्वपूर्ण उपलब्धिका रूपमा व्याख्या गरेकी छन्।

उनले भनिन्, “यो मुद्दाले यस्तो संसार उजागर गरेको छ जहाँ क्रूरता नै मुद्रा हो, हिंसा मनोरञ्जन हो र बालबालिकालाई नियन्त्रण र प्रभुत्वको खेलमा निशाना बनाइन्छ।”

पिरोका अनुसार नेपाल र उनका सहकर्मीहरूले सञ्चालन गरेको गतिविधि सामान्य आपराधिक सञ्जाल मात्र नभई कमजोर अवस्थामा रहेका बालबालिकालाई लक्षित गरी योजनाबद्ध रूपमा शोषण गर्ने अभियान थियो।

“इन्क्रिप्टेड स्क्रिनपछाडि लुकेर आफू सुरक्षित छु भन्ने ठान्ने जोकोहीलाई हामी खोज्नेछौँ र रोक्नेछौँ,” उनले चेतावनी दिएकी छन्।

यस मुद्दाको अनुसन्धान एफबीआईको वासिङ्टन फिल्ड अफिसले गरेको हो। त्यसमा एफबीआईका न्युयोर्क र चार्लोटस्थित कार्यालय तथा अन्तर्राष्ट्रिय साझेदार निकायहरूले सहयोग गरेका थिए। नर्थ क्यारोलाइनाको मिडल डिस्ट्रिक्टस्थित अमेरिकी महान्यायाधिवक्ताको कार्यालयले पनि अनुसन्धानमा सहयोग गरेको थियो।

मुद्दाको अभियोजन सहायक अमेरिकी महान्यायाधिवक्ताहरू करेन शिन्स्की र जनानी अयङ्गरले गरेका हुन्।

यो मुद्दा अमेरिकी न्याय विभागको सन् २००६ मा सुरु गरिएको ‘प्रोजेक्ट सेफ चाइल्डहुड’ अभियानअन्तर्गत अघि बढाइएको हो। इन्टरनेटमार्फत बालबालिकाको यौन शोषण तथा दुर्व्यवहार गर्ने व्यक्तिको पहिचान, पक्राउ र अभियोजन गर्नुका साथै पीडितको उद्धार गर्ने उद्देश्यले उक्त अभियान सञ्चालन गरिएको हो।

नेपालले अभियोग स्वीकार गरेसँगै ‘७६४’ सञ्जालको नेतृत्व तहविरुद्धको अनुसन्धानमा महत्त्वपूर्ण प्रगति भएको अमेरिकी अधिकारीहरूले बताएका छन्। अब मार्च ५, २०२७ मा हुने सुनुवाइले नेपाललाई दिइने अन्तिम संघीय सजाय निर्धारण गर्नेछ।

लेखक किशोर पन्थी

किशोर पन्थी ‘खसोखास’ र ‘नेपयोर्क’ का संस्थापक तथा प्रधानसम्पादक हुन्। उनी ‘कम्पन’, ‘अनट्रान्सलेटेबल’ र ‘जिरो माइल’ गरी तीन पुस्तकका लेखक हुन्। उनी सामाजिक मुद्दा, आप्रवासन र राजनीतिबारे लेख्छन्। पन्थीले न्युयोर्कलाई आफ्नो मुख्य कार्यक्षेत्र बनाउँदै विगत १५ वर्षदेखि अमेरिकी-नेपाली डायस्पोरामा पत्रकारिता गरिरहेका छन्।

यस लेखकका थप समाचार →