२ मंसिर २०८३, बुधबार| Wednesday, November 18, 2026
अमेरिका

ट्रम्प प्रशासनविरुद्ध संसदीय छानबिनको आधार तयार गर्दै सांसद गार्सिया, कागजात सुरक्षित राख्न १२ जनालाई पत्र

आगामी जनवरीदेखि अमेरिकी प्रतिनिधिसभाको निगरानी समिति सम्हाल्ने सम्भावना रहेका सांसद गार्सियाले प्रशासनको मनोमानी र स्वार्थको द्वन्द्वमाथि छानबिन गर्ने चेतावनी दिँदै १२ जनालाई पत्र पठाएका हुन्

Photo: Louis Velazquez/ Unsplash

अमेरिकी प्रतिनिधिसभाको निगरानी समितिका सम्भावित आगामी अध्यक्ष रोबर्ट गार्सियाले राष्ट्रपति डोनाल्ड ट्रम्पका शीर्ष सहयोगी, पूर्वअधिकारी र परिवारका सदस्यहरू गरी १२ जनालाई पत्राचार गर्दै व्यापक छानबिनको संकेत दिएका छन्। यही महिना सम्पन्न मध्यावधि निर्वाचनमा बहुमत हासिल गरेपछि आगामी जनवरीदेखि संसदीय समितिको नेतृत्व सम्हाल्ने तयारीमा रहेका डेमोक्रेटिक सांसद गार्सियाले ट्रम्प परिवारको कथित भ्रष्टाचार, जेफ्री एपस्टिनसम्बन्धी फाइल र प्रशासनको आप्रवासन कडाइका विषयमा अनुसन्धान अगाडि बढाउन लागेका हुन्।

क्यालिफोर्नियाका सांसद गार्सियाले पठाएको पत्रमा ट्रम्प परिवारको स्वार्थको द्वन्द्व र सरकारी शक्तिको दुरुपयोगसँग सम्बन्धित कागजातहरू सुरक्षित राख्न निर्देशन दिइएको छ। एक विज्ञप्तिमार्फत उनले प्रशासनको मनोमानी, दुराचार र दुरुपयोग अन्त्य गर्न संसदीय निगरानीको अधिकार प्रयोग गरिने बताएका छन्। यद्यपि, यस्ता पत्रहरूलाई गैरकानूनी कार्यको प्रमाण नभई आगामी छानबिनको पूर्वसंकेतका रूपमा हेरिन्छ।

गार्सियाले उपराष्ट्रपति जेडी भान्स, महान्यायाधिवक्ता टड ब्लान्च, ह्वाइट हाउसका चिफ अफ स्टाफ स्टिफन मिलर र पूर्व चिफ अफ स्टाफ सुसी वाइल्सलाई पत्र पठाएका छन्। त्यसैगरी, ट्रम्पका छोराहरू डोनाल्ड ट्रम्प जुनियर र एरिक ट्रम्प, ज्वाइँ जारेड कुशनर, ग्रीसका लागि पूर्वराजदूत किम्बर्ली गिलफोयल, पूर्व होमल्यान्ड सेक्युरिटी सेक्रेटरी क्रिस्टी नोएम र पूर्व सल्लाहकार कोरी लेवान्डोस्कीलाई पनि कागजात सुरक्षित राख्न भनिएको छ।

पत्रहरूको मुख्य केन्द्रबिन्दु स्वर्गीय व्यवसायी तथा यौन अपराधी जेफ्री एपस्टिनसम्बन्धी फाइलहरूको सार्वजनिकीकरण र उनकी सहयोगी घिस्लेन म्याक्सवेललाई न्यूनतम सुरक्षा भएको कारागारमा सारिएको विषय रहेको छ। संघीय कारागार ब्युरोका निर्देशक विलियम मार्शल तृतीय र ब्रायन संघीय कारागार शिविरकी वार्डेन तानिशा हललाई पत्र लेख्दै गार्सियाले म्याक्सवेल र एपस्टिनको अपराध लुकाउन सघाउने व्यक्तिहरूबाट जानकारी लिन समिति पछि नपर्ने चेतावनी दिएका छन्।

उता, ह्वाइट हाउसकी प्रवक्ता लरेन बिसले राष्ट्रपति ट्रम्प जोकोहीसँग काम गर्न इच्छुक रहे पनि डेमोक्रेटहरूले ‘नक्कली छानबिन’ र अतिवादी नीति अघि सारेमा त्यो अमेरिकी जनताको विरुद्ध हुने प्रतिक्रिया दिएकी छन्। यसैगरी, ह्वाइट हाउसका सल्लाहकार विल शार्फले बुधबार डेमोक्रेटिक सांसदहरूलाई पत्र लेख्दै वर्तमान अल्पमतका सदस्यहरूले मागेका कागजात बुझाउन प्रशासन बाध्य नभएको र जनवरीपछि ती अनुरोधहरू स्वतः निष्क्रिय हुने बताएका छन्।

पूर्व सल्लाहकार कोरी लेवान्डोस्कीका प्रवक्ताले सामाजिक सञ्जाल ‘एक्स’ मार्फत गार्सियाले भ्रामक भाष्य निर्माण गर्न खोजेको आरोप लगाउँदै उपयुक्त समय र मञ्चमा त्यसलाई गलत साबित गरिने बताएका छन्। जस्टिस डिपार्टमेन्टले यसबारे तत्काल प्रतिक्रिया नदिए पनि राष्ट्रपति ट्रम्पले डेमोक्रेटिक सांसदहरूले कसैलाई धम्क्याए वा नधम्क्याएको विषयमा छानबिन गर्न जस्टिस डिपार्टमेन्टलाई आदेश दिइसकेका छन्। ह्युस्टनका शीर्ष संघीय अभियोजक आरोन रिट्जले समेत गार्सियालाई पत्र पठाउँदै संसदीय छानबिनको वैधानिक विधायिकी उद्देश्य हुनुपर्ने उल्लेख गरेका छन्, जसलाई कानुनी विज्ञहरूले राजनीतिक प्रतिद्वन्द्वी लक्षित कदमको संज्ञा दिएका छन्।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →