अमेरिकाका दुवै तटीय क्षेत्रमा भीषण वर्षा र आँधी, फ्लोरिडामा आपतकाल र क्यालिफोर्नियामा उडान अवरुद्ध
साउथ फ्लोरिडाको हलिउड सहरमा भीषण वर्षा र बाढीका कारण आपतकाल घोषणा गरिएको छ भने सवारीसाधन डुबानमा परेका छन्। उता पश्चिमी तटको क्यालिफोर्नियामा खराब मौसमका कारण उडान र सडक यातायात अवरुद्ध हुनुका साथै पहिरोको चेतावनी दिइएको छ
Photo: Zooey Li/ Unsplash
अमेरिकाको साउथ फ्लोरिडा र पश्चिमी तटीय क्षेत्र क्यालिफोर्नियामा सुस्त गतिमा अघि बढेको आँधीसहितको भीषण वर्षाले जनजीवन अस्तव्यस्त बनाएको छ । फ्लोरिडामा बाढीका कारण सवारीसाधनहरू डुबानमा पर्नुका साथै एक सभाघरको छत भत्किएपछि बुधबार आपतकालीन अवस्था घोषणा गरिएको छ ।
यता, पश्चिमी तटीय राज्य क्यालिफोर्नियामा पनि भारी वर्षा र तीव्र गतिको हावाहुरीका कारण सान फ्रान्सिस्को विमानस्थलमा उडानहरू रोकिएका छन् । साथै, जलयातायात सेवा अवरुद्ध हुनुका साथै नापा काउन्टीलगायतका उत्तरी क्षेत्रका सडकहरू जलमग्न भएका छन् ।
राष्ट्रिय मौसम सेवाका अनुसार बुधबारसम्मको २४ घण्टामा फ्लोरिडाको ब्रोवार्ड काउन्टीका केही भागमा १५.३ इन्च वर्षा मापन गरिएको छ । फ्लोरिडाको एटलान्टिक तटीय क्षेत्रमा शुक्रबारसम्म थप १२ इन्चसम्म वर्षा हुन सक्ने पूर्वानुमान गरिएको छ । फ्लोरिडा आपतकालीन व्यवस्थापन विभागले सम्भावित विनाशकारी वर्षाले आकस्मिक बाढी र समुद्री छालको जोखिम निम्त्याउन सक्ने चेतावनी दिएको छ ।
यसका साथै, ‘थ्याङ्क्सगिभिङ’ बिदाको मुखैमा उत्तरी बहामास नजिकै न्यूनचापीय प्रणाली विकसित भइरहेको मायामीस्थित राष्ट्रिय आँधी केन्द्रले जनाएको छ । आगामी साताको सुरुसम्ममा यो प्रणाली दक्षिणपूर्वी र मध्य-एटलान्टिक तटमा उपोष्णकटिबंधीय वा उष्णकटिबंधीय आँधीमा परिणत हुन सक्ने अनुमान छ ।
मायामीस्थित राष्ट्रिय मौसम सेवाकी मौसमविद् अलेजेन्ड्रा गार्सियाका अनुसार ‘एल निनो’ नामक प्राकृतिक मौसमी प्रणालीका कारण अक्टोबरदेखि मे महिनासम्म रहने फ्लोरिडाको सामान्य सुक्खा याम प्रभावित भई भारी वर्षा भएको हो ।
फ्लोरिडाको हलिउड सहरका मेयर जोस लेभीले बुधबार आपतकाल घोषणा गर्दै सर्वसाधारणलाई अत्यावश्यक कामबाहेक सडकमा ननिस्कन आग्रह गरेका छन् । बाढी र पानीमा फसेका सवारीसाधनका कारण फ्लोरिडा टर्नपाइक र इन्टरस्टेट ९५ का केही खण्डहरू बन्द गरिएका छन् ।
हलिउड सहरमा रातभरमा उद्धार तथा सहयोगका लागि ३०० भन्दा बढी कल प्राप्त भएको मेयर लेभीले जानकारी दिए । वर्षाका कारण हलिउडस्थित ‘टेम्पल सिनाई’ को छत भत्किएको छ भने एक स्थानीय अस्पतालको छतमा क्षति पुग्नुका साथै करिडोरमा पानी पसेको छ । यद्यपि, मानवीय क्षति भने नभएको जनाइएको छ ।
फोर्ट लाउडरडेलमा बुधबार बिहानसम्म ५.७२ इन्च वर्षा भएको छ, जसले सन् १९५९ को १.८ इन्च वर्षाको दैनिक कीर्तिमान तोडेको छ । मौसम प्रतिकूल भएपछि ब्रोवार्ड र मायामी-डेड काउन्टीका विद्यालयहरू बिहीबार बन्द गर्ने घोषणा गरिएको छ । उत्तरी फ्लोरिडाको सेन्ट जोन्स नदीमा पनि सामान्य बाढीको चेतावनी जारी गरिएको छ ।
उता, लस एन्जलस काउन्टी अग्नि नियन्त्रण विभागले डढेलो प्रभावित क्षेत्रहरूमा माटोको लेदोसहितको पहिरो जान सक्ने भन्दै शुक्रबार बिहानसम्मका लागि सुरक्षित स्थानमा सर्न चेतावनी जारी गरेको छ । सोही जोखिमका कारण सान फ्रान्सिस्कोको दक्षिणमा रहेको राजमार्ग-१ को ४७ माइल खण्ड बुधबार बन्द गरिएको छ ।
सान फ्रान्सिस्कोमा २.२८ इन्च वर्षा भई दैनिक नयाँ कीर्तिमान कायम भएको छ । समुद्री छालले बाढी रोक्न राखिएका अवरोधहरू पार गरेपछि एम्बार्काडेरो क्षेत्र जलमग्न बनेको छ । बाढी र पहिरोका कारण नापा, मारिन, सान माटेओ र सान्ता क्लारा काउन्टीका विभिन्न राजमार्गहरू अवरुद्ध भएका छन् ।
इस्ट बे क्षेत्रमा प्रतिघण्टा ५० माइल र अल्टामोन्ट पास क्षेत्रमा ७० माइलसम्मको गतिमा हावा चल्ने पूर्वानुमान गरिएको छ । यस्तै, सिएरा नेभाडाका उच्च हिमाली भागहरूमा शुक्रबारसम्म ४ फिटसम्म हिमपात हुन सक्ने मौसमविद्हरूले बताएका छन् ।
मौसम सेवाका अनुसार थ्याङ्क्सगिभिङ साताको सुरुवातसँगै शनिबार जर्जिया र दक्षिण क्यारोलिना तथा आइतबार र सोमबार उत्तरी क्यारोलिनादेखि न्युयोर्कको लङ आइल्यान्ड र न्यु इङ्ल्यान्ड क्षेत्रसम्म भारी वर्षा हुने सम्भावना रहेकाले यातायात सेवा थप प्रभावित हुने देखिएको छ ।





