ट्रम्पले भने – इरानविरुद्धको कारबाही रोकिँदैन, स्ट्रेट अफ होर्मुजमा कुनै खतरा छैन
प्रकाशित मिति : १७ चैत्र २०८२, मंगलबार
अमेरिकी राष्ट्रपति डोनाल्ड ट्रम्पले इरानलाई स्ट्रेट अफ होर्मुज पुनः खोल्न दबाब दिने प्रयासबाट आफु अहिले नै पछि हट्न तयार नभएको बताएका छन् । मंगलबार सीबीएस न्यूजसँगको अन्तर्वार्तामा ट्रम्पले बेलायत लगायतका अन्य देशहरूले इरानविरुद्धको अमेरिकी–इजरायल युद्धमा सहभागिता जनाउन सैन्य सहयोग नपठाएको स्पष्ट पारे ।
“कुनै समयमा म हट्नेछु, तर अहिले होइन। अन्य देशहरूले पनि आएर यसलाई सम्हाल्नुपर्छ। इरान कमजोर बनाइएको छ, तर उनीहरूले आफ्नै काम आफैं गर्नुपर्छ,” उनले भने।
ट्रम्पले स्ट्रेट अफ होर्मुजलाई विश्व तेल आपूर्तिको करिब २० प्रतिशत जाने मुख्य मार्ग भन्दै भने, “म त्यहाँ रहनेछु, तर यदि उनीहरूलाई तेल लिन गाह्रो भइरहेको छ भने, उनीहरूले आफैं आएर लिन सक्छन्। उनीहरूले कसैलाई सहयोग गर्न चाहेनन्। नेटो खराब छ, सबै खराब छन्। कुनै ठूलो खतरा छैन, किनभने इरानलाई कमजोर बनाइएको छ।”
राष्ट्रपति ट्रम्पले इरानले जहाजहरू र खाडी देशहरूको पूर्वाधारमा आक्रमण गरिरहे पनि यो क्षेत्र “सुरक्षित” रहेको दोहोर्याए।
सैन्य कारबाहीको समयबारे प्रश्न गर्दा उनले भने, “धेरै समय लाग्दैन। हामी तालिकाभन्दा दुई हप्ता अगाडि छौं।” युद्ध सुरु हुँदा ट्रम्पले ४–६ हप्तामा अन्त्य हुने बताएको थिए, तर यो अहिले पाँचौं हप्तामा प्रवेश गरेको छ।
उनले इरानको सैन्य शक्ति कमजोर भएको पनि औंल्याए। “इरानसँग अब सैन्य शक्ति छैन। उनीहरूसँग जे थियो, सबै कमजोर भएको छ। हामीले आफ्नो काम गरिसकेका छौं। पुनर्निर्माण गर्न उनीहरूलाई १० वर्ष लाग्नेछ। पूर्ण शासन परिवर्तन भएको छ। अहिलेका मानिसहरू पहिलेभन्दा फरक र केही हदसम्म बढी व्यवहारिक छन्।”
राष्ट्रपतिको प्राथमिक उद्देश्य इरानलाई कहिल्यै परमाणु हतियार बनाउन नदिनु हो। तर उनले इरानको समृद्ध युरेनियम भण्डार हटाउन नसक्दा पनि विजय घोषणा सम्भव छ कि छैन भन्नेबारे स्पष्ट जवाफ दिएनन्।
ट्रम्पले भने, “त्यो धेरै गहिराइमा गाडिएको छ, जसलाई हटाउन धेरै गाह्रो हुनेछ। गत जुनमा अमेरिका–इजरायलले इरानका परमाणु केन्द्रहरूमा गरेको बमबारीले पूर्ण ध्वस्त पारिएको थियो। यो सुरक्षित छ, तर अन्तिम निर्णय हामी गर्नेछौं।”