मध्यपूर्व तनावबीच स्पेनको कदम – अमेरिकी सैन्य विमानहरूका लागि आफ्नो हवाई क्षेत्र बन्द
प्रकाशित मिति : १६ चैत्र २०८२, सोमबार
अमेरिकी वायुसेना बी-१ ल्यान्सर बमवर्षक विमान । तस्वीर : जस्टिन ट्यालिस/एएफपी-रासस
स्पेनले इरानमाथि भइरहेका आक्रमणमा संलग्न अमेरिकी सैन्य विमानहरूका लागि आफ्नो हवाई क्षेत्र बन्द गर्ने निर्णय गरेको छ। यो कदम यसअघि संयुक्त रूपमा सञ्चालन गरिएका सैन्य अड्डाहरू प्रयोग गर्न नदिने निर्णयभन्दा अझ कडा मानिएको छ।
स्पेनकी रक्षा मन्त्री मार्गारीटा रोबल्सले सोमबार म्याड्रिडमा सञ्चारकर्मीसँग कुरा गर्दै भनिन्, “हामी इरानसँग सम्बन्धित युद्धका कुनै पनि गतिविधिका लागि न त सैन्य अड्डा प्रयोग गर्न अनुमति दिन्छौं, न त हवाई क्षेत्र।”
यो निर्णयबारे पहिलो पटक स्पेनी सञ्चारमाध्यम एल पेसले सैन्य स्रोतलाई उद्धृत गर्दै समाचार सार्वजनिक गरेको थियो।
हवाई क्षेत्र बन्द गरिएपछि मध्यपूर्वतर्फ गइरहेका सैन्य विमानहरूले अब नेटो सदस्य स्पेनलाई बाइपास गर्नुपर्ने भएको छ। यद्यपि, आपतकालीन अवस्थाहरूमा भने यो नियम लागू नहुने बताइएको छ।
स्पेनका अर्थ मन्त्री कार्लोस कुएर्पोले एक रेडियो अन्तर्वार्तामा स्पष्ट पारे, “यो निर्णय स्पेनी सरकारले पहिले नै लिएको नीतिको निरन्तरता हो, जसअनुसार अन्तर्राष्ट्रिय कानुनविरुद्ध एकपक्षीय रूपमा सुरु गरिएको युद्धमा सहभागी नहुने हो।”
उनले यो कदमले अमेरिकासँगको सम्बन्धमा असर पर्न सक्ने प्रश्नलाई पनि अस्वीकार गरेनन्, तर निर्णय कानुनी र नैतिक आधारमा गरिएको बताए।
स्पेनका प्रधानमन्त्री पेड्रो सान्चेज लामो समयदेखि इरानमाथि भएका अमेरिकी तथा इजरायली आक्रमणका कडा आलोचक रहँदै आएका छन्। उनले यी आक्रमणलाई ‘गैरजिम्मेवार र अन्तर्राष्ट्रिय कानुनविरुद्ध’ भनेका छन्।
अमेरिकी राष्ट्रपति डोनाल्ड ट्रम्पले भने स्पेनको निर्णयप्रति असन्तुष्टि जनाउँदै म्याड्रिडसँगको व्यापार सम्बन्ध कटौती गर्न सक्ने चेतावनी दिएका छन्। अमेरिकाले युद्धका क्रममा स्पेनका सैन्य अड्डा प्रयोग गर्न नपाएकोमा असन्तुष्टि व्यक्त गरेको छ।