लिथुआनियामा सैन्य तालिमका क्रममा बेपत्ता तीन अमेरिकी सैनिक मृत फेला, एक जनाको खोजी जारी
प्रकाशित मिति : चैत्र १८, २०८१ सोमबार
Military personnel work at the site of a rescue operation for missing US soldiers at Pabrade training ground, in Lithuania, on March 28, 2025. Lithuanian Defense Minister Dovile Sakaliene said that “all scenarios” were still being considered regarding the fate of four American soldiers who went missing during an exercise in the east of the country, stressing that their search continued under difficult conditions. (Photo by Petras Malukas / AFP)
गत हप्ता लिथुआनियाको पाब्राडे नजिकै सैन्य तालिमका क्रममा बेपत्ता भएका चार अमेरिकी सैनिकमध्ये तीन जनाको शव फेला परेको छ । यस्तै, एक जनाको खोजी कार्य जारी रहेको सेनाले जनाएको छ।
उनीहरूको पहिचान खुलाइएको छैन।
ती सैनिकहरू अमेरिकी सेनाको फोर्ट स्टुअर्ट, जर्जियामा तैनाथ थिए। उनीहरू मंगलबार तालिम अभ्यासका क्रममा हराएका थिए। सेनाले दिएको जानकारीअनुसार उनीहरू सवार एम ८८ हर्क्युलिस बख्तरबन्द उद्धार सवारी बुधबार एक तालिम क्षेत्रमा करिब १५ फिट गहिरो पानी र माटोमा फसेको अवस्थामा फेला परेको थियो।
लिथुआनियाका रक्षा मन्त्री डोविले सकालिएनले एम ८८ दलदलमा फसेको हुन सक्ने बताएका छन् ।
६ दिनसम्म चलेको कठिन उद्धार प्रयासपछि सोमबार बिहान उक्त सवारीलाई दलदलबाट निकालिएको थियो। सेनाका अनुसार, उद्धार कार्यलाई सहज बनाउन ठूलो क्षमताको स्लरी पम्प, क्रेन, ३० टनभन्दा बढी गिटी, र विषय विज्ञहरू परिचालित गरिएका थिए।
त्यसैगरी, पोल्यान्डको सशस्त्र बलले पनि १५० सैन्य इञ्जिनियरहरूको टोली, अतिरिक्त पानी पम्प, ट्र्याक गरिएको उद्धार सवारी र आवश्यक उपकरणहरू पठाएको थियो। अमेरिकी नौसेनाका गोताखोरहरू पनि घटनास्थलमा पुगेका थिए।
आइतबार राति नौसेनाका गोताखोरहरूले दलदलको गहिराइमा पुगेर उद्धार सवारीमा इस्पात केबल जोड्न सफल भएका थिए। करिब दुई घण्टा लगाएर सवारीलाई दलदलबाट बाहिर निकालिएको सेनाले जनाएको छ।
सेनाका अनुसार अहिले उक्त क्षेत्रलाई ग्रिड प्रणालीमा विभाजन गरेर व्यवस्थित खोजी कार्य भइरहेको छ। लिथुआनियाली विशेषज्ञहरूले ग्राउन्ड पेनिट्रेटिङ राडार प्रदान गरेका छन् जसले उद्धार कार्यमा सहायता गरिरहेको छ।
तेस्रो इन्फेन्ट्री डिभिजनका कमान्डिङ जनरल मेजर जनरल क्रिस्टोफर नोरीले भने, ‘हामीले गुमाएका सैनिकहरू हाम्रो परिवारका सदस्य थिए। खोजी कार्य तबसम्म समाप्त हुँदैन, जबसम्म सबैजना घर फर्कँदैनन्।’
सेनाले दुर्घटनाको कारण पत्ता लगाउन अनुसन्धान जारी रहेको जनाएको छ।