एक महिनाअघि कुकुरले टोकेको कुरा लुकाएका १४ वर्षीय बालकको मृत्यु
प्रकाशित मिति : भाद्र १९, २०८० मंगलबार
भारतको उत्तर प्रदेशको गाजियाबादमा कुकुरको टोकाइबाट १४ वर्षीय बालकको मृत्यु भएको छ । बालकलाई करिब एक महिनाअघि कुकुरले टोकेको थियो तर डरका कारण बालकले बाबुआमालाई जानकारी दिएनन् ।
समाचार एजेन्सी पीटीआईले प्रहरीलाई उद्धृत गर्दै आठ कक्षामा अध्ययनरत शाहवाजको सोमबार साँझ मृत्यु भएको जनाएको छ ।
प्रहरीका अनुसार अनुसार शाहवाज विजय नगर पुलिस स्टेशन क्षेत्र अन्तर्गत पर्ने चरण सिंह कालोनीका बासिन्दा थिए। साहवाजलाई करिब एक महिनाअघि छिमेकीको कुकुरले टोकेको थियो तर डरले बाबुआमासँग यो कुरा लुकाएका थिए ।
यसपछि उनलाई रेबिज भयो र सेप्टेम्बर १ मा उनले असामान्य व्यवहार गर्न थाले। परिवारले प्रश्न सोध्दा शाहवाजले आफूलाई छिमेकीको कुकुरले टोकेको बताए ।
परिवारले शाहवाजलाई उपचारका लागि दिल्लीको सरकारी अस्पतालमा लगे तर उनलाई त्यहाँ भर्ना गरिएको थिएन। शाहवाजलाई अन्ततः आयुर्वेदिक उपचारका लागि बुलन्दशहर लगिएको परिवारले प्रहरीलाई बताएको छ ।
तर बुलन्दशहरबाट गाजियाबाद फर्कने क्रममा एम्बुलेन्समै बालकको मृत्यु भएको थियो ।
कोतवाली क्षेत्रका एसीपी निमिश पाटिलले यस विषयमा उजुरी दर्ता भएको र कुकुरको मालिकलाई कारबाही गरिने बताए।
-बीबीसी