पाटन अस्पतालमा पीसीआर मेसिन जडान,आइसोलेसना ९० जना
प्रकाशित मिति : बैशाख ५, २०७७ शुक्रबार
स्वास्थ्य तथा जनसंख्या मन्त्रालयले कोरोना संक्रमितको परीक्षण, नियन्त्रण र उपचारको लागि सुदूर पश्चिम प्रदेशमा ३८ जना चिकित्सकहरूको टोली खटाइएको बताएको छ । मन्त्रालयमा शुक्रबार आयोजित नियमित पत्रकार सम्मेलनमा प्रवक्ता विकास देवकोटाले न्याम्सका ३८ चिकित्सकहरुलाई त्यसतर्फ खटाइएको जानकारी दिनुभयो ।
खटिएका चिकित्सकहरु आजै विमान चार्टड गरेर धनगढीतर्फ लागेको पनि उहाँले बताउनुभयो । खटिएका चिकित्सकहरु कम्तिमा १ महिना सुदूरपश्चिम क्षेत्रमा रहने र आवश्यक परे उनीहरुको समय थप गरिने जानकारी पनि दिनुभयो ।
प्रवक्ता देवकोटाले पाटन अस्पतालमा पनि पीसीआर मेसिन जडान भएको जानकारी दिनुहुँदै अब पीसीआर प्रविधिबाट देशभर १४ स्थानबाट परीक्षण सुरु भएको बताउनुभयो ।
उहाँले पछिल्लो समय मुलुकका बिभिन्न भागमा ३० हजार -यापिड डाइनोष्टिक टेष्टको कीट पठाइएको बताउँदै हालसम्म देशभर ७० हजार कीटहरु पठाइसकिएको जानकारी दिनुभयो । केही जिल्लामा भएको -यापिड टेष्टको रिपोर्ट पोजिटिभ आउने क्रम जारी रहे पनि अधिकांशको अन्तिम रिपोर्ट नेगेटिभ आएको पनि बताउनुभयो ।
डाक्टर देवकोटाले हालसम्म पीसीआर प्रविधिबाट ७ हजार ६ सय ८८ र -यापिड टेष्ट विधिबाट १७ हजार ५ सय ६२ गरी कुल २४ हजार २ सय ५३ को परीक्षण भइसकेको जानकारी दिनु हुँदै क्वारेन्टाइनमा बस्नेको संख्या ४ हजार ७ सय ६ रहेको बताउनुभयो । हाल आइसोलेसना रहनेको संख्या ९० रहेको जानकारी पनि उहाँले दिनुभयो ।