सुरक्षाको लागि उपकरण माग्ने दुई स्वास्थ्यकर्मीको जागिर नै खोसियो
प्रकाशित मिति : चैत्र १९, २०७६ बुधबार
कोरोना भाइरसको जोखिमलाई चुनौती दिदै विरामीहरुको उपचारमा खटिएका दुई स्वास्थ्यकर्मीले आफ्नो स्वास्थ्यको सुरक्षाको लागि उपकरण मागेपछि निलम्बनमा परेका छन् । उनीहरुलाई अस्पताल प्रशासनले निलम्बन गरेपछि अन्य स्वास्थ्यकर्मीहरु पनि आन्दोलित बनेका छन् ।
धनुषाको जनकपुरधाम स्थित जानकी मेडिकल कलेज शिक्षण अस्पतालको ब्रम्हपुरीस्थित सिटी अस्पतालमा कार्यरत स्वास्थ्यकर्मीहरुले अत्यावश्यक पीपीई र उपकरण माग गरेपछि दुई जनालाई अस्पताल प्रशाशनले निलम्बन गरेपछि बिभिन्न वार्डहरुमा कार्यरत अन्य स्वास्थ्यकर्मीहरु कामकाज अवरुद्ध गरेर आन्दोलित बनेका हुन् ।
अस्पतालमा पेडरेटिक वार्ड इञ्चार्ज नम्रता राणा र कम्बाइण्ड वार्डका इञ्चार्ज उदित कुमारी महतोलाई अस्पताल प्रशाशनले निलम्बर गरी कारवाही गरेपछि अस्पतालमा कार्यरत झण्डै डेढ़ दर्जन स्वास्थ्यकर्मी आन्दोलित बनेका हुन ।
कारोना संक्रमितहरुको लागि आइसोलेसन सेन्टरको रुपमा समेत तोकिएको यो सिटी अस्पतालमा आफूहरु ज्यान जोखिममा हालेर काम गरेको र काम गर्दा चाहिने आवश्यक उपकरण र सामग्रीहरु माग गरेपछि यतिबेला उल्टै कारवाही गरेकोले आन्दोलनमा उत्रनु परेको भन्दै स्वास्थ्यकर्मीहरुले आक्रोश व्यक्त गरेका छन् । यता अस्पताल प्रशासनले भने दुई जना व्यक्तिले आफूहरुले काम नगर्ने भनेपछि अस्पतालले कारवाही गरेको दावी गरेको छ ।