न्युजर्सीका कैयन स्थानमा कर्फयु आदेश
प्रकाशित मिति : फाल्गुन २९, २०७६ बिहीबार
न्युजर्सीका कैयन स्थानमा कर्फयु आदेश जारी गरिएको छ । न्युजर्सीको जर्सीसिटीका ठूला रात्रीक्लबहरुमा कर्फयु आदेश जारी गरिएको जर्सी सिटीका मेयर स्टीभ फुलोपले घोषणा गरेका छन् ।
कोरोना संक्रमणबिरुद्ध लड्न त्यस्तो आदेश जारी गरिएको हो । १ हजारजनासम्म ग्राहकलाई सेवादिनसक्ने रात्रीक्लबहरुमा यस्तो कर्फयु जारी गरिएको हो । तर कर्फयुको प्रकृति कस्तो हुने भन्नेबारे मेयरले केही बताएका छैनन् ।
फुलोपले यसबाट रेष्टुरेण्टहरुभने प्रभावित नहुने बताएका छन् । न्युजर्सी राज्यमा कोरोनाको संक्रमण फैलिएपनि जर्सी सिटीमा भने अहिलेसम्म कोरोना संक्रमण पुष्टी भएको छैन ।
अमेरिकामा १० दिनको अन्तरालमा १२६४ मा कोरोना संक्रमण, ४४ राज्यमा फैलियो
अमेरिकामा १० दिनको अन्तरलामा १२६४ जनामा कोरोना संक्रमण पुष्टी भएको छ भने अहिलेसम्म संक्रमितको संख्या १३६४ पुगेको छ । मार्च २ सम्म अमेरिकामा कोरोना संक्रमितको संख्या जम्मा १ सय रहेको थियो ।
मंगलबारदेखि अमेरिकामा कोरोना संक्रमितको संख्यामा उल्लेख्य बृद्धि भएको छ । मंगलबारमात्र २९० जना कोरोना संक्रमणका बिरामी थपिएका थिए भने बुधबार ३०७ जना कोरोना संक्रमणका बिरामी थपिएका छन् ।
अमेरिकामा संक्रमितमध्ये १५ जनाकोमात्र सफल उपचार गरिएको छ भने ३८ जनाको मृत्यु भइसकेको छ । १३०१ जना संक्रमितको अवस्था सामान्य रहेको छ भने १० जनाको अवस्था चिन्ताजनक रहेको छ ।
विहिबारसम्म अमेरिकाका ४४ राज्यमा कोरोनाको संक्रमण फैलिसकेको छ । वासिंटन राज्यमा ३७३ जनामा संक्रमण भएको छ भने न्युयोर्कमा २२८ जनामा संक्रमण भएको छ । क्यालिफोर्नियामा पनि २०१ जनामा संक्रमण पुष्टी भइसकेको छ ।
अहिलेसम्म अलाबामा, अलास्का, आइदाहो, मेन, मोन्टाना र वेष्ट भर्जिनियाबाहेक सबै राज्यमा कोरोनाको संक्रमण देखिएको छ ।
