न्युयोर्कमा बिहिबार र शुक्रबार व्यापक सुरक्षा कारवाही, एमएस १३ गिरोहका सय पक्राउ
प्रकाशित मिति : पुस ४, २०७६ शुक्रबार
न्युयोर्कमा बिहिबार र शुक्रबारको व्यापक सुरक्षा कारवाहीमा कुख्यात एमएस १३ गिरोहका झण्डै १ सय पक्राउ परेका छन् । न्युयोर्कको इतिहासमा एमएस १३ बिरुद्धको यो सबैभन्दा ठूलो कारवाही भएको बताइएको छ ।
कानुन कार्यान्वयन इकाइहरुले झण्डै २ बर्ष लगाएर गरेको अनुसन्धानपछि यो कारवाही गरिएको हो । गिरोहको लामो समयदेखि पकड रहेको सफोक काउन्टीमा विशेष अनुसन्धान गरिएको थियो ।
पक्राउ परेकाहरुमध्ये ९६ जनालाई हत्याको षड्यन्त्र, लागु औषधको कारोबारदेखि हतियारबिक्रिसम्मका अभियोगहरु लगाइएको छ । पक्राउ पर्नेहरु १६ देखि ५९ बर्षभित्रका छन् भने अमेरिकी नागरिकदेखि कागजपत्रविहिनसम्म छन् ।
एमएस १३ निर्मम र जंगली गिरोहका रुपमा कुख्यात छ । उनीहरुले खुँडाको प्रयोग गरेर व्यक्तिको हत्या गर्दै आएका छन् । यो गिरोहमा एल साल्भाडोर र होण्डुरसका किशोरहरुलाई आवद्ध गराइदै आएको छ ।
यो गिरोहका कैयन सदस्यहरु अमेरिकामा नै जन्मेकाहरु समेत छन् । यो गिरोहले सन् २०१६ देखि यता न्युयोर्कको लंग आइल्याण्ड, लस एन्जलस र वासिंटन डिसी लगायतका क्षेत्रमा कैयनको हत्या गरिसकेको छ ।