अमेरिकी सरकारले माग्यो ८२ हजार फेसबुक प्रयोकर्ताका विवरण
प्रकाशित मिति : कार्तिक २७, २०७६ बुधबार
अमेरिकी सरकारले सन् २०१९ को अहिलेसम्म ८२ हजार फेसबुक प्रयोकर्ताका विवरणहरु मागेको फेसबुकले खुलासा गरेको छ । सन् २०१९ को झण्डै साढे १० महिनाको अवधिमा अमेरिकी सरकारले ८२ हजार ४ सय ६१ जनाका विवरणहरु मागेको छ ।
झण्डै ८२ हजारका विवरणहरु माग्न सरकारले फेसबुकसँग ५० हजार ७ सय १४ अनुरोधहरु गरेको थियो । फेसबुकले सरकारको अनुरोधमा ८८ प्रतिशत डाटाहरु उत्पादन गरेको र त्यसमध्ये ४७ हजार ४ सय ५७ जनाका विवरण कानुनी प्रकृयामा रहेको जनाएको छ ।
विभिन्न देशका सरकारले फेसबुकसँग प्रयोकर्ताका विवरणहरु माग्ने क्रम ह्वात्तै बढेको जनाइएको छ । सन् २०१३ मा फेसबुकलाई २५ हजार ६ सय ७ अनुरोध आएकोमा सन् २०१९ मा १ लाख २८ हजार ६ सय १७ अनुरोध प्राप्त भएका छन् ।
फेसबुकले आफूहरुले सरकारलाई चोरबाटोबाट प्रयोकर्ताका विवरणहरु उपलब्ध नगराउने बताएको छ । जुन सरकारले डाटाहरु मागेपनि नाजायज भएको खण्डमा आफूहरुले अदालतमा कानुनी लडाई लड्ने फेसबुकले जनाएको छ ।