अमेरिका खाडीमा सैनिक बढाउँदै !

खसोखास अमेरिका ब्यूरो

---

प्रकाशित मिति : आश्विन ७, २०७६ मंगलबार

एएफपी /अमेरिकाले खाडी क्षेत्रमा थप सैनिक पठाउने घोषणा गरेको छ । साउदी अरेबियाका महत्वपूर्ण तेल प्रशोधन केन्द्रमा आक्रमण भएपछि अमेरिकाले उक्त कदम चालेको हो ।अमेरिकी राष्ट्रपति डोनल्ड ट्रम्पले इरानमाथि थप प्रतिबन्धको घोषणा गरेको केही घण्टा नबित्दै सैनिक संख्या बढाउने निर्णय सार्वजनिक भएको हो ।

अमेरिकाले साउदी अरेबियाका तेल प्रशोधन केन्द्रहरूमा इरानले ड्रोनमार्फत आक्रमण गरेको आरोप लगाउँदै आएको छ । ह्वाइट हाउसमा सञ्चारकर्मीसँग कुरा गर्दै राष्ट्रपति ट्रम्पले इरानको केन्द्रीय बैंकमाथि नै प्रतिबन्ध लगाएको घोषणा गरेका छन् । इरानमाथि तत्कालै सैन्य कारबाही गर्ने योजना नभए पनि अर्को मुलुकविरुद्ध यो सबैभन्दा ठूलो कारबाही हो ।

अमेरिकी अर्थ मन्त्रालयले साउदी अरेबियाका तेल प्रशोधन केन्द्रमा गरिएको आक्रमणमा संलग्न रहेको भन्दै इरानी केन्द्रीय बैंकमाथि प्रतिबन्ध घोषणा गरेको छ । साउदी तेल उद्योगमा आक्रमण भएलगत्तै विश्व बजारमा एकाएक तेलको मूल्य वृद्धि भएको थियो ।

अमेरिकी रक्षामन्त्री मार्क एस्परले गत जुनमा इरानले अमेरिकी गुप्तचर ड्रोन खसालेयताका हरेक कार्य अमेरिका र यसका गठबन्धनविरुद्ध केन्द्रित भएको दाबी गरे । उनले साउदी अरेबिया र युनाइटेड अरब इमिरेटको आग्रहमा खाडी क्षेत्रमा थप अमेरिकी फौज पठाउन लागेको स्पष्ट पारे ।

रक्षामन्त्री एस्परले अमेरिकी सेना आक्रामक कारबाहीका लागि खाडी क्षेत्रमा पठाउन लागिएको भए पनि उनीहरू हाल मुख्य रूपमा हवाई तथा क्षेप्यास्त्र प्रतिरक्षामा केन्द्रित हुने बताए । मेरिकी संयुक्त सैन्य प्रमुख जो डन्फोर्डले खाडी क्षेत्रमा पठाइने सैनिक संख्या एक हजारको हाराहारीमा मात्र रहने स्पष्ट गरे । कतिपयले राष्ट्रपति ट्रम्पले इरानविरुद्ध युद्ध शुरु गर्ने अनुमान गरे पनि अमेरिकी नीति एकाएक फेरिएको थियो ।

गत जुनमा इरानले अमेरिकी जासुसी ड्रोन खसालेपछि तत्काल इरानविरुद्ध कारबाही गर्न राष्ट्रपति ट्रम्पले आदेश दिए पनि अन्तिम क्षणमा उक्त आदेश फिर्ता लिएका थिए । अमेरिकी राष्ट्रपति ट्रम्पले गत वर्ष सन् २०१५ को बहुपक्षीय आणविक सम्झौताबाट एकपक्षीय रूपमा अलग हुँदै इरानविरुद्ध कडा प्रतिबन्ध घोषणा गरेका थिए ।