क्यानडामा ‘नेपाल-डे’ मनाउने तयारी, कार्यसमितिमा नयाँ सदस्य
प्रकाशित मिति : भाद्र २४, २०७६ मंगलबार
गैरआवासीय नेपाली संघ (एनआरएनए) क्यानडाका नवनिर्वाचित प्रतिनिधिहरुले औपचारिक रुपमा कार्यभार सम्हालेसँगै कार्यसमितिमा नयाँ सदस्यहरु पनि थपिएका छन् ।
ब्राम्पटन शहरस्थित एभरेष्ट तेक्वान्दो हलमा आयोजित हस्तान्तरण कार्यक्रमपछि बसेको कार्यसमितिको बैठकले विभिन्न क्षेत्रका लागि संयोजक र केही सल्लाहकार नियुक्त गरेको हाे ।
मिडिया संयोजकमा पत्रकार बद्री तिमल्सिना, पर्यटन समितिको संयोजकमा प्रदिप मरहठ्ठा र आर्थिक समितिको संयोजकमा व्यवसायी अमृतो भट्टराईलाई नियुक्त गरिएकाे छ भने स्वास्थ्य सम्बन्धीमा सुरेश गौतमलाई संयोजक तोकिएको छ ।
नव निर्वाचित अध्यक्ष चिरन्जिवी घिमिरेको अध्यक्षतामा बसेको बैठकले यसअघिको कार्यकालमा कानूनी सल्लाहकार रहेका अतुल सुवेदीलाई यसपटक पनि निरन्तरता दिएको प्रवक्ता दिनेश खतिवडाले जानकारी दिएका छन् । उनका अनुसार बैठकपछि अध्यक्ष घिमिरे र निवर्तमान अध्यक्ष गोपीकृष्ण काफ्लेले मनोनित हुने सबै संयोजक तथा सल्लाहकारलाई बधाइ तथा शुभकामना दिएका थिए ।
यसैबीच, नेपाल भ्रमण वर्ष २०२० लाई लक्षित गरेर एनआरएनए क्यानडाले टोरोन्टोमा नेपाल डे मनाउने भएको छ । यही सेप्टेम्बर १९ तारिखका दिन विभिन्न स्थानीय नेपाली संघ-संस्थाहरुसँगको सहकार्यमा टोरोन्टोको क्विन्सपार्कमा हुने कार्यक्रममा ओन्टारियो राज्यका सरकारी प्रतिनिधिहरुको सहभागिता रहने प्रवक्ता खतिवडाले बताए । यस कार्यक्रमबाट क्यानडेली पर्यटकहरुलाई नेपालबारे जानकारी गराइने र नेपाल जान उनीहरुलाई प्रेरित गरिने बताइएको छ ।