नयाँ पब्लिक चार्ज नियम: लामो विदेश बसाइपछि अमेरिका फर्किँदा ग्रिनकार्डवाहकले के प्रमाण देखाउनुपर्छ?
कानुन व्यवसायी बासु फुलारा । फोटो: राजन काफ्ले
न्युयोर्क — सेप्टेम्बर १८ देखि लागू भएको नयाँ अमेरिकी ‘पब्लिक चार्ज’ नीतिले सबै ग्रिनकार्डधारीलाई नयाँ परीक्षणको दायरामा नल्याए पनि अमेरिकाबाहिर लगातार १८० दिनभन्दा बढी बसेर पुनः अमेरिका प्रवेश गर्न खोज्ने स्थायी बासिन्दाका लागि थप जटिलता निम्त्याउन सक्ने अध्यागमन कानुन व्यवसायी बासु फुलाराले बताएका छन्।
न्युयोर्कका अध्यागमन कानुन व्यवसायी फुलाराका अनुसार नयाँ नियम ग्रिनकार्ड नवीकरण वा अमेरिकी नागरिकता प्राप्त गर्ने प्रक्रियामा लागू हुँदैन। यसको मुख्य प्रभाव लामो समय अमेरिकाबाहिर बसेर पुनः अमेरिका फर्किने क्रममा देखिन सक्छ।
अमेरिकी अध्यागमन तथा राष्ट्रियता ऐन अन्तर्गत कुनै वैध स्थायी बासिन्दा लगातार १८० दिनभन्दा बढी अमेरिकाबाहिर बसेर फर्किँदा उसलाई पुनः प्रवेशका लागि आवेदकका रूपमा व्यवहार गर्न सकिन्छ। यस्तो अवस्थामा उसलाई अध्यागमन तथा राष्ट्रियता ऐन अन्तर्गतको ‘पब्लिक चार्ज’ सहित विभिन्न अयोग्यताका आधारमा परीक्षण गर्न सकिने फुलाराले बताए।
उनका अनुसार सेप्टेम्बर १८, २०२६ देखि यस्तो पब्लिक चार्ज समीक्षा सन् २०२२ को नियमको तुलनामा व्यापक भएको छ। अधिकारीहरूले आवेदकको समग्र परिस्थितिलाई हेर्न सक्नेछन्, जसमा उमेर, स्वास्थ्य, पारिवारिक अवस्था, सम्पत्ति तथा आर्थिक स्रोत, शिक्षा र सीप तथा रोजगारीको इतिहासलगायतका विषय पर्न सक्छन्।
नयाँ नीतिअन्तर्गत सेप्टेम्बर १८ वा त्यसपछि प्राप्त गरिएका निश्चित आयमा आधारित सरकारी सहायता कार्यक्रमहरूलाई पनि पब्लिक चार्ज मूल्यांकनमा फराकिलो रूपमा विचार गर्न सकिने फुलाराले बताए। तर सेप्टेम्बर १८ अघि प्राप्त लाभहरूका हकमा सामान्यतः आय कायम राख्न दिइने नगद सहायता र सरकारको खर्चमा लामो अवधिको संस्थागत हेरचाहजस्ता सीमित सुविधाहरू मात्रै प्रासंगिक रहने उनले बताए।
फुलाराका अनुसार अमेरिकाको प्रवेश नाकामा गरिएको पब्लिक चार्जसम्बन्धी निष्कर्षले प्रवेश प्रक्रिया ढिला हुन, प्रवेश अस्वीकार हुन वा हटाउनेसम्बन्धी कानुनी प्रक्रियामा पठाइने अवस्था आउन सक्छ। तर पब्लिक चार्जसम्बन्धी निष्कर्षले मात्र ग्रिनकार्ड स्वतः रद्द भने हुँदैन।
लामो समय अमेरिकाबाहिर बस्दा अर्को छुट्टै कानुनी प्रश्न पनि उठ्न सक्ने उनले बताए—स्थायी बासिन्दाले आफ्नो अमेरिकी स्थायी बसोबास त्यागेको हो कि होइन भन्ने विषय। फुलाराका अनुसार पब्लिक चार्ज र स्थायी बसोबास त्यागसम्बन्धी प्रश्न दुई फरक कानुनी विषय हुन्।
“ग्रिनकार्डधारीहरूले विदेशमा लामो समय बस्नुपर्ने अवस्था भए आफ्नो यात्रा सावधानीपूर्वक योजना बनाउनुपर्छ,” फुलाराले भने। उनीहरूले अमेरिकासँगको आफ्नो सम्बन्ध देखाउने बलियो प्रमाणहरू सुरक्षित राख्नुपर्ने र १८० दिनभन्दा बढी विदेश बसेपछि वैध ग्रिनकार्ड भएकै कारण पुनः प्रवेश सामान्य रूपमा हुने ठान्न नहुने उनले सुझाव दिए।
फुलाराका अनुसार अमेरिकाबाहिर लामो समय बस्नुपर्ने ग्रिनकार्डधारीले अमेरिका फर्किने क्रममा आफ्नो परिवार, घर, रोजगारी, आर्थिक स्रोत तथा अन्य अमेरिकी सम्बन्धसँग जोडिएका प्रमाणहरू व्यवस्थित राख्नु उपयोगी हुन सक्छ।
नयाँ नियमको प्रभाव प्रत्येक व्यक्तिको परिस्थितिअनुसार फरक हुन सक्ने भएकाले लामो विदेश यात्राको योजना बनाइरहेका स्थायी बासिन्दाले आफ्नो व्यक्तिगत अवस्थाअनुसार अध्यागमन कानुनी सल्लाह लिनु उपयुक्त हुने फुलाराले बताए।
कानुनी अस्वीकरण: यो समाचारमा प्रस्तुत जानकारी सामान्य सूचनाका लागि मात्र हो र यसलाई व्यक्तिगत कानुनी सल्लाहका रूपमा लिनु हुँदैन। अध्यागमनसम्बन्धी नियमको प्रभाव व्यक्तिको व्यक्तिगत परिस्थिति, यात्रा इतिहास र अन्य तथ्यअनुसार फरक पर्न सक्छ। आफ्नो अवस्थासँग सम्बन्धित कानुनी निर्णय वा यात्रा योजना बनाउनुअघि योग्य अध्यागमन अधिवक्तासँग परामर्श गर्नुहोस्।